Aldymen kelgen qonaqtar shyǵarmashylyq kitap kórmesin tamashalap, Túrkistan maqamdary negizinde jaryq kórgen «Tekti sózdiń tóresi» termeler jinaǵynyń tusaýyn kesti.
Sodan soń mereitoi iesine arnalǵan «Táýelsizdik tarlandary» derekti filminiń kórsetilimi ótti. Aqynnyń týǵan jeri shaǵalaly Shardaradan bastaý alyp, Túrki áleminiń rýhani astanasy Túrkistanda jalǵasyn tapqan keshti jazýshy, ádebiet synshysy Qulbek Ergóbek júrgizip otyrdy.
Túrkistan oblysy ákiminiń orynbasary Sáken Qalqamanov óńir basshysynyń quttyqtaýyn jetkizip, aqynǵa qurmet kórsetti. Oblystyq máslihat hatshysy Qairat Balabiev te Túrkistan óńirinen shyqqan aqynnyń qoǵamǵa sińirgen eńbegi mol ekenin aitty. Budan ári R.Seitmetov atyndaǵy Túrkistan sazdy- drama teatrynyń ártisteri Qazybek Isanyń óleńderin oqydy.
Mereitoi iesiniń áriptesteri men dostary, qoǵam qairatkerleri, ziialy qaýym ókilderi aqjarma tilekterin arnady. Kesh barysynda bishiler myń burala bi bilese, aqynnyń sózine jazylǵan ánder shyrqaldy. Kesh sońynda mereitoi iegeri sóz alyp, kelgen kórermenge alǵysyn bildirdi. Shámshi Qaldaiaqovtyń «Otan» áni kesh shymyldyǵyn japty.
