1. Bir ai buryn kóligimdi jóndettim. Menen buryn bireý kelip alǵan eken. Óńkigen dáý qara Jipin joǵaryǵa asyp qoidy da, Taldyqorǵannan tań qarańǵysynda shyǵyp, jetip kelgenin aitty. 2 saǵatqa jeter-jetpes ýaqytta Almatyǵa kirip úlgeripti.
"Men máshineniń aldyńǵy nómirin alyp tastaimyn da, basamyn ǵoi. Nómirdi alyp tastasań, rahat, joldaǵy kameralarǵa túspeisiń" dep qoiady... Osy da maqtan ba?
Túrine qarasam, túk qysylatyn emes. Migittiń sózin aityp tur biraq. Osydan 10 jyl buryn ǵana mundai áńgime aitý kez kelgen erkektiń súiegine tańba edi...
2. Qazaqty súietin bir tanysym balasyn álde aralas, álde taza orys baqshasyna beripti. "Tili jańa shyǵyp kele jatyr, "bir, dva, úsh, chetyre" dep qatyrady" deidi. Túrinde esh qysylý joq.
"Úibai-aý, orysshaǵa nege berdiń?" dep shyr ete qalsam, "oi, kezinde orysshadan qinaldyq qoi" deidi. Basyn jaryp jibergim keldi.
Ái, orysshaǵa tili kelmese, óziniki kelmedi, balanyń jazyǵy ne? Onyń miyn atala kóje qylatyndai ne jazyǵy bar? Sondyqtan kezinde orysshadan qinalǵandar, eskertemin, balalaryńyz ózińizdei darynsyz, qabileti tómen dep oilap qalmańyzdar. Olar mobildi zamannyń urpaǵy, qajettigine orai 4-5 tildi erkin meńgeredi. Biraq tili qazaqsha shyǵýy, qazaqty túsinýi shart!
3. Bizdiń qurdastar men tustastar da quda atana bastady. Qyz alyp, qyz berip jatyr.
Jaqynda sondai bir tustasym qyzyn ákesi joq balaǵa bergisi kelmepti. Ne degen kompleks bul?
Mysaly, men de ákemnen 9 jasymda aiyrylyp qaldym, soǵan kinálimin be? Ákesiz balanyń aldyna kim shyǵypty, bolashaǵyn kim kórip kelipti? Qaita urpaqtyń teńin tapqanyna riza bolyp, bata berip, ári qarai ómirleriniń jaqsy úilesip ketýine dáneker bolmaimyz ba?..
Esei Jeńisuly,
