Abý-Dabi qalasynda (BAÁ) "QazMunaiGaz" UK AQ kompaniialar tobyna kiretin "Qazaqteńizkólikfloty" ulttyq teńiz keme qatynasy kompaniiasy men AD Ports Group arasynda negizgi talaptar týraly kelisimge qol qoiyldy. Qujat Kaspii óńirinde seriktestikti nyǵaitýǵa jáne biznesti keńeitýge baǵyttalǵan, dep jazady Dalanews.kz.
"Taraptar Kaspii teńizinde jumys isteýge arnalǵan, syiymdylyǵy 500 JFE-den (jiyrma fýttyq ekvivalent) asatyn eki zamanaýi konteinerlik kemeni salýǵa kelisti. Jańa az shógindi kemeler Transkaspii baǵytynyń ainalymy men ótkizý qabiletin arttyrýǵa múmkindik beredi", delingen QMG baspasóz qyzmetiniń habarlamasynda.
Sonymen qatar kompaniialar Kaspii teńizi arqyly ótetin intermodaldy parom jelisin damytý josparyn rastady. Joba syiymdylyǵy joǵary paromdar salýdy jáne zamanaýi terminal infraqurylymyn qurýdy kózdeidi, bul óz kezeginde otandyq eksporttaýshylar men Orta dáliz qatysýshylary úshin tranzit ýaqytyn edáýir qysqartady.
Strategiialyq seriktestik kólik infraqurylymyn damytýǵa jáne Qazaqstannyń halyqaralyq logistikadaǵy básekege qabiletin arttyrýǵa baǵyttalǵany da naqtylanady.
Aita ketsek, 2025 jyly 15 qańtarda Memleket basshysy Qasym-Jomart Toqaev Abu Dhabi Ports Group bas direktory Muhammed Ál-Shamisimen kezdesti. Prezident Abu Dhabi Ports kompaniiasynyń birqatar iri nysan qurylysyna qatysty josparyna qoldaý kórsetip, bul bastamalar Qazaqstannyń Kaspii teńizindegi ailaq jáne teńiz infraqurylymyn damytý jónindegi strategiialyq múddesine sai keletinin atap ótti.
