Shymkentte jeke qoimalar aýmaǵynda shyqqan iri órt tolyqtai sóndirildi. Oqiǵa saldarynan kúiik shalǵan eki adam aýrýhanaǵa jetkizildi, dep habarlaidy dalanews.kz.
Tótenshe jaǵdailar ministrliginiń málimetinshe, órt 25 maýsym kúni Eńbekshi aýdanyndaǵy Isfidjab turǵyn alabynda ornalasqan jeke qoimalar aýmaǵynda bolǵan.
Tilsiz jaý qoimalardyń shatyryn, júk kóliginen tógilgen dizel otynyn jáne aýmaqta saqtalǵan rezeńke buiymdardy sharpyǵan. Órt shyqqan jerdiń dál janynda dizel otyny tielgen júk kóligi turǵan.
Oqiǵa kezinde eki adam túrli dárejedegi kúiik alyp, meditsinalyq mekemege jatqyzyldy.
Órtti sóndirýge Tótenshe jaǵdailar ministrliginiń 56 qyzmetkeri men 30 tehnikasy jumyldyryldy. Sondai-aq oqiǵa ornynda Apattar meditsinasy ortalyǵynyń mamandary kezekshilik etti.
Ministrliktiń málimetinshe, órt sóndirýshilerdiń jedel ári úilesimdi áreketiniń arqasynda jalynnyń janarmai tielgen júk kóligine taralýyna jol berilmei, órt tolyqtai aýyzdyqtalǵan.
Qazir órttiń shyǵý sebebi men oqiǵanyń barlyq mán-jaiy anyqtalyp jatyr.
Tótenshe jaǵdailar ministrligi turǵyndardy órt qaýipsizdigi talaptaryn qatań saqtaýǵa shaqyryp, qarapaiym qaýipsizdik erejelerin saqtaý adam ómiri men múlkin qorǵaýdyń basty kepili ekenin eske saldy.
