Soltústik Qazaqstan oblysy Esil aýdanynda qatty jel apatty jaǵdaida turǵan sý munarasyn qulatty. Eńbek aýylynyń turǵyndary bul nysandy jóndeýdi jyldar boiy surap kelgenin aitady. Abyroi bolǵanda, oqiǵadan eshkim zardap shekken joq, dep habarlaidy dalanews.kz.
Halyqstan basylymyna aýyl turǵyndary 15 jyl buryn salynǵan sý munarasy ábden tozǵanyn jetkizgen. Sózderinshe, byltyrdan beri ol múldem jumys istemei, qaraýsyz qalǵan qaýipti nysanǵa ainalǵan. Jergilikti jurt birneshe ret dabyl qaǵyp, quzyrly organdarǵa shaǵymdanǵanymen, másele sheshimin tappaǵan.
Aqyry qaýipti nysannyń taǵdyryn tabiǵat sheshti. Kúndiz qatty soqqan jeldiń saldarynan kóp tonnalyq qurylym jerge qulaǵan.
Qazir aýyl turǵyndary sýsyz qalǵan joq. Aýdan ákimdiginiń málimetinshe, aýyzsý Esil – Iavlenka magistraldi sý qubyry arqyly tikelei berilip jatyr.
“Esil aýyldyq okrýgine qarasty Eńbek aýylynda jergilikti atqarýshy organnyń balansynda turǵan apatty sý munarasynyń qulaǵany ras. Oqiǵa túski ýaqytta aýa raiynyń kúrt buzylyp, búiirden soqqan qatty jeldiń saldarynan bolǵan. Qazirgi tańda turǵyndarǵa aýyzsý berý toqtaǵan joq, júie shtattyq rejimde jumys istep tur”, - dep habarlady aýdan ákimdigi.
Degenmen aptap ystyqta bolǵan mundai jaǵdai turǵyndardy alańdatyp otyr.
