Iran Ormýz buǵazy arqyly ótýge áreket jasaǵan júk kemesine oq atqan. Bul týraly Reuters agenttigine aty-jónin jariialamaǵan AQSh-tyń eki laýazymdy ókili málimdedi, dep habarlaidy dalanews.kz.
Málimetke sáikes, keme buǵan deiin belgisiz snariadtyń soqqysyna ushyraǵanyn habarlaǵan. Ulybritaniianyń teńiz qaýipsizdigin baqylaý agenttigi (UKMTO) oqiǵanyń Omandaǵy Dahit portynyń ońtústik-shyǵysynan shamamen 7,5 teńiz mili qashyqtyqta bolǵanyn málimdedi. Snariad kemeniń oń jaq bortyna tigen.
Buǵan deiin Irannyń Islam revoliýtsiiasy saqshylar korpýsy (KSIR) Ormýz buǵazy arqyly qaýipsiz ótý tek Tegeran belgilegen baǵyttarmen ǵana júzege asyrylatynyn eskertken bolatyn. KSIR talaptardy oryndamaǵan kemelerge qatysty shara qoldanylatynyn da málimdegen.
Qazirgi ýaqytta AQSh pen Iran biligi atalǵan oqiǵaǵa qatysty resmi túsinikteme bergen joq. Oqiǵa álemdik munai tasymalynyń mańyzdy dálizi sanalatyn Ormýz buǵazyndaǵy qaýipsizdik máselesine qatysty alańdaýshylyqty kúsheitip otyr.
