Bul jóninde úkimettiń telegram-arnasy habarlady. Memleketke ótetin bul aktsiialar Nazarbaevtyń jaqyn týysyna tiesili bolǵan.
Qazaqstan bailanys salasynyń monopolisi - "Qazaqtelekom" aktsiialarynyń 24 paiyzdan astamy Qairat Satybaldy quryltaishysy sanalatyn Skyline Investment Company S.A. kompaniiasyna qaraǵan. Eks-prezident Nursultan Nazarbaevtyń baýyrynyń balasy Qairat Satybaldy qazir qamaýda otyr.
Qaýlyda: "Skyline Investment Company S.A. jekemenshik kompaniiasynyń "Qazaqtelekom" aktsionerlik kompaniiasynyń 2 671 481 qarapaiym aktsiiasyn syiǵa tartý kelisim-sharty negizinde memleket menshigine qaitarý týraly usynysy maquldansyn. Bul – aktsionerlik qoǵamnyń jarǵylyq kapitalynyń 24,95 paiyzy" delingen.
Úkimettiń habarlaýynsha, Alatau Capital Investment kompaniiasy da syiǵa tartý jolymen "Qazaqtelekomdaǵy" 413 412 aktsiiasyn memleket menshigine ótkizýdi uiǵarǵan.
Aktsiialar memleket menshigine qandai sebeppen qaitarylyp jatqany týraly eshteńe aitylmaidy.
Qairat Satybaldy "qyzmet babyn asyra paidalandy" jáne "Qazaqtelekom" AQ qarjysyn iri kólemde urlady" degen kúdikpen 13 naýryzda ustalyp, tutqyndalǵan. Jemqorlyqpen kúres qyzmeti Satybaldy "memleket qaýipsizdigine qater tóndiretin basqa ister boiynsha tergelip jatqanyn" aitty.
2021 jylǵy zertteýinde Azattyq Liýksembýrgtegi LBR reestri boiynsha, Qairat Satybaldy Skyline Investment Company S.A. kompaniiasynyń jalǵyz quryltaishysy ekenin anyqtaǵan. Ashyq derekkózdegi aqparatqa qaraǵanda, Satybaldy 2016 jyly óziniń Alatau Capital Invest kompaniiasy arqyly "Qazaqtelekomnyń" 4 paiyzǵa jetpeitin aktsiiasyn satyp alǵan.
4 sáýirde Qazaqstannyń jemqorlyqpen kúres agenttigi eks-prezidenttiń nemere inisine qaraityn basqa kompaniialarda da aqsha urlaý faktileri bolǵan degen málimdeme jasady. Birneshe kúnnen soń "biznesti zańsyz tartyp aldy" degen kúdikpen Qairat Satybaldynyń burynǵy áieli Gúlmira Satybaldy da tutqyndaldy.
Ótken aidyń sońynda jemqorlyqpen kúres qyzmeti Gúlmira Satybaldy Shymkenttegi jolaýshy tasymaly jáne avtokólik joldary basqarmasyndaǵy sheneýniktermen jáne "Ariia – Jańa Astana" kompaniiasy basshylarymen birlesip, oryndalmaǵan qurylys-montaj jumystary úshin tólengen 1,5 million dollardy jymqyrdy degendi aitty.
Qańtar oqiǵasynan soń burynǵy prezidenttiń otbasy músheleri men onyń mańaiyndaǵy adamdar joǵary laýazymdarynan aiyrylyp, keibireýi tutqyndaldy. Qamalǵandar arasynda Nazarbaevtardyń qudasy, biznesmen Qairat Boranbaev bar. Onyń qyzy Alima Nazarbaevtyń jieni Aisultannyń áieli bolǵan (Aisultan 2020 jyly tamyzda Londona qaitys bolǵan). Boranbaevqa "kvazimemlekettik sektorda asa iri kólemde aqsha urlady" degen aiyp taǵyldy. Bir kezderi ákesiniń ornyn basýy múmkin dep sanalǵan eks-prezidenttiń úlken qyzy Dariǵa Nazarbaeva depýtat qyzmetin toqtatyp, naýryz aiynda májilisten ketti.
