"Za rýlem Kazahstan" jýrnalynyń redaktory, jýrnalist Aleksei Alekseev qaraǵandylyq Alika Muhamadieva esimdi qyzǵa qatysty jazba jariialap, onyń áreketin qatań synǵa aldy. Eske sala keteiik, Alika áleýmettik jelidegi jazbasynda qazaq halqyn qorlap, "mambetter" degen sózdi qoldanǵany úshin qoǵamnyń ashýyna tigen bolatyn, dep habarlaidy Dalanews.kz.
Qaraǵandydan shyqqan 22 jastaǵy Alika esimdi boijetkenniń qylyǵy jurttyń ashýyn týǵyzdy. Ózi kriptovaliýta arqyly aqsha tabýdy úiretedi eken. Demek, aqyly az emes. Biraq aqyldyń kóptigi ádebiniń kemdigin jasyra almady.
Onyń aitqan beipil sóziniń birin bala kezde Óskemende estigenmin. Ol kezde sondai sóz aýzynan shyqqandy kórse, úlkender teris ainalatyn. Al ekinshi dóreki sózdi de estitin kez bar. Biraq óz ortam ondai sózden ada.
Sonda oiǵa túigenim mynaý: Alika muny otbasynan boiyna sińirip ósken. Áitpese búkil halyqty «mambet» dep qorlap, mensinbeýi múmkin emes. Qazaqtyń jerinde turyp, aýasyn jutyp, dámin tatyp otyryp, halyqqa biikten qaraý – naǵyz teksizdik.
Onyń aýzynan shyqqan sóz – búkil elge jabylǵan kúie. Iaǵni, meniń de ar-namysyma tigen is. Sebebi men osy eldiń azamatymyn. Halqymdy qadirleimin, elimdi súiemin. Demek, Alikanyń aitqany meniń de namysyma tiedi.
Bul jaǵdai qoǵamda áli de osyndai oidaǵy adamdardyń bar ekenin kórsetip otyr. Biraq menińshe, bulardyń kóbi áldeqashan kóship ketken ne ketýge qamdanýda. Sebebi óz elin jek kórip, sol eldiń ortasynda ómir súrý – ózin-ózi qinaý. Ne turǵan jerińdi qurmette, ne qadir tutatyn jerińe kóship ket. Árine, syrtqa ketkenniń bári osy topqa kirmeidi. Bireý jańa orta izdep, endi bireý múmkindiktiń sońynan ketedi.
Al endi jurtty kemsitken Alikaǵa qandai jaza laiyq degen suraq tur.
Halyqtyń narazylyǵy – osyndai astamshylyqqa berilgen jaýap. Onyń menmendigi, halyqty qorlaýy – ótken zamannyń sarqynshaǵy.
Qyzdy elden shyǵarýǵa da, azamattyǵynan aiyrýǵa da bolar. Bostandyqqa shyqqan soń, bálkim, ózi de keter. Biraq bir nárse anyq: qaida barsa da, ózimen birge osy minezin ala ketedi. Eger boiyndaǵy minin túzeýge asyqpasa, ol barǵan jerinde de jurtty mensinbeitin qalpynda qalady.
Bul oqiǵadan árkim óz sabaǵyn aldy. Óz basym ortamyzdan osyndai adam shyqqany úshin qysylamyn. Qaraǵandynyń jurty da uialǵan shyǵar. Óitkeni sol qalada eńbegi adal, nieti taza, tárbiesi túzý jurt az emes.
Qyzdyń jazasyn sot shesher. Al onyń aldynda qiyn jol tur. Eger osy oqiǵadan sabaq alyp, ishki jan dúniesin túbegeili ózgertpese, kelbetiniń sulýlyǵy ishindegi shirigen minezin báribir jasyra almaidy
