"زا رۋلەم كازاحستان" جۋرنالىنىڭ رەداكتورى، جۋرناليست الەكسەي الەكسەيەۆ قاراعاندىلىق اليكا مۇحامادييەۆا ەسىمدى قىزعا قاتىستى جازبا جاريالاپ، ونىڭ ارەكەتىن قاتاڭ سىنعا الدى. ەسكە سالا كەتەيىك، اليكا الەۋمەتتىك جەلىدەگى جازباسىندا قازاق حالقىن قورلاپ، "مامبەتتەر" دەگەن ءسوزدى قولدانعانى ءۇشىن قوعامنىڭ اشۋىنا تيگەن بولاتىن، دەپ حابارلايدى Dalanews.kz.
قاراعاندىدان شىققان 22 جاستاعى اليكا ەسىمدى بويجەتكەننىڭ قىلىعى جۇرتتىڭ اشۋىن تۋعىزدى. ءوزى كريپتوۆاليۋتا ارقىلى اقشا تابۋدى ۇيرەتەدى ەكەن. دەمەك، اقىلى از ەمەس. ءبىراق اقىلدىڭ كوپتىگى ادەبىنىڭ كەمدىگىن جاسىرا المادى.
ونىڭ ايتقان بەيپىل ءسوزىنىڭ ءبىرىن بالا كەزدە وسكەمەندە ەستىگەنمىن. ول كەزدە سونداي ءسوز اۋزىنان شىققاندى كورسە، ۇلكەندەر تەرىس اينالاتىن. ال ەكىنشى دورەكى ءسوزدى دە ەستيتىن كەز بار. ءبىراق ءوز ورتام ونداي سوزدەن ادا.
سوندا ويعا تۇيگەنىم مىناۋ: اليكا مۇنى وتباسىنان بويىنا ءسىڭىرىپ وسكەن. ايتپەسە بۇكىل حالىقتى «مامبەت» دەپ قورلاپ، مەنسىنبەۋى مۇمكىن ەمەس. قازاقتىڭ جەرىندە تۇرىپ، اۋاسىن جۇتىپ، ءدامىن تاتىپ وتىرىپ، حالىققا بيىكتەن قاراۋ – ناعىز تەكسىزدىك.
ونىڭ اۋزىنان شىققان ءسوز – بۇكىل ەلگە جابىلعان كۇيە. ياعني، مەنىڭ دە ار-نامىسىما تيگەن ءىس. سەبەبى مەن وسى ەلدىڭ ازاماتىمىن. حالقىمدى قادىرلەيمىن، ەلىمدى سۇيەمىن. دەمەك، اليكانىڭ ايتقانى مەنىڭ دە نامىسىما تيەدى.
بۇل جاعداي قوعامدا ءالى دە وسىنداي ويداعى ادامداردىڭ بار ەكەنىن كورسەتىپ وتىر. ءبىراق مەنىڭشە، بۇلاردىڭ كوبى الدەقاشان كوشىپ كەتكەن نە كەتۋگە قامدانۋدا. سەبەبى ءوز ەلىن جەك كورىپ، سول ەلدىڭ ورتاسىندا ءومىر ءسۇرۋ – ءوزىن-وزى قيناۋ. نە تۇرعان جەرىڭدى قۇرمەتتە، نە ءقادىر تۇتاتىن جەرىڭە كوشىپ كەت. ارينە، سىرتقا كەتكەننىڭ ءبارى وسى توپقا كىرمەيدى. بىرەۋ جاڭا ورتا ىزدەپ، ەندى بىرەۋ مۇمكىندىكتىڭ سوڭىنان كەتەدى.
ال ەندى جۇرتتى كەمسىتكەن اليكاعا قانداي جازا لايىق دەگەن سۇراق تۇر.
حالىقتىڭ نارازىلىعى – وسىنداي استامشىلىققا بەرىلگەن جاۋاپ. ونىڭ مەنمەندىگى، حالىقتى قورلاۋى – وتكەن زاماننىڭ سارقىنشاعى.
قىزدى ەلدەن شىعارۋعا دا، ازاماتتىعىنان ايىرۋعا دا بولار. بوستاندىققا شىققان سوڭ، بالكىم، ءوزى دە كەتەر. ءبىراق ءبىر نارسە انىق: قايدا بارسا دا، وزىمەن بىرگە وسى مىنەزىن الا كەتەدى. ەگەر بويىنداعى ءمىنىن تۇزەۋگە اسىقپاسا، ول بارعان جەرىندە دە جۇرتتى مەنسىنبەيتىن قالپىندا قالادى.
بۇل وقيعادان اركىم ءوز ساباعىن الدى. ءوز باسىم ورتامىزدان وسىنداي ادام شىققانى ءۇشىن قىسىلامىن. قاراعاندىنىڭ جۇرتى دا ۇيالعان شىعار. ويتكەنى سول قالادا ەڭبەگى ادال، نيەتى تازا، تاربيەسى ءتۇزۋ جۇرت از ەمەس.
قىزدىڭ جازاسىن سوت شەشەر. ال ونىڭ الدىندا قيىن جول تۇر. ەگەر وسى وقيعادان ساباق الىپ، ىشكى جان دۇنيەسىن تۇبەگەيلى وزگەرتپەسە، كەلبەتىنىڭ سۇلۋلىعى ىشىندەگى شىرىگەن مىنەزىن ءبارىبىر جاسىرا المايدى
