Qazaqstandyqtar Smart Coffee kofehanalar jelisine jappai boikot jariialaýǵa kóshti. Buǵan Qańtar oqiǵasyna qatysty áleýmettik jelide taraǵan pikir túrtki boldy. Jeli qoldanýshylarynyń ashýyn týdyrǵan jazba reseilik kásipker, atalǵan brendtiń Qazaqstandaǵy franshiza iesi Evgenii Glinskiidiń atynan jariialanǵan. Alaida kásipker bul pikirdi ózi jazbaǵanyn aityp, kópshilikten keshirim surap, aqtalýǵa kiristi, dep habarlaidy Dalanews.kz.
Jurt nege dúrlikti?
Reseilik kásipker Instagram-daǵy ZTB paraqshasyndaǵy "Pýtin Jeńistiń 80 jyldyǵyna orai Ýkrainamen ýaqytsha bitim jariialady" degen jazbanyń astyna “Qańtar oqiǵasyna” qatysty pikir qaldyrǵan.
“Atqa minip qarsy alasyńdar ma? Sender tipti elderińde bolǵan tóńkeristi óz betterińshe toqtata almadyńdar, batyrlar", – dep jazǵan ol.
Bul pikir kópshiliktiń namysyna tiip, UQShU áskeriniń aralasýy mazaq qylǵan sóz retinde qabyldandy. Skrinshot Threads jáne ózge áleýmettik jelilerde qyzý talqyǵa tústi.
Kóp uzamai jeli qoldanýshylary 2GIS qosymshasynda atalǵan brendke jappai tómen baǵa qoiyp, áleýmettik boikot jariialady.
Kásipkerdiń jaýaby
Kópshiliktiń synyna ilikken kásipker atalǵan jaittan soń videoúndeý jasap, mán-jaidy túsindirip, halyqtan keshirim surady.
"Búgin túngi 2-de paraqshama shabýyl bastaldy. Bireý meniń atymnan jazylǵan pikirdiń skrinshotyn taratty. Men ózim Bashqurtstanda týǵanmyn, jartylai bashqurt, jartylai tatarmyn. Bizdiń halyqtyń mádenieti men dúnietanymy qazaq halqyna óte jaqyn. Álgi pikir meniń ózime de aýyr tidi. Ondai sózdi eshqashan jazǵan emespin", – dedi ol.
Glinskiidiń aitýynsha, Qazaqstandaǵy Smart Coffee komandasynda shamamen 40 adam jumys isteidi, basym bóligi – qazaqtar.
"Meniń atymnan jazylǵan pikir úshin keshirim suraimyn. Ol meniń de namysyma tidi. Qańtardaǵy jaranyń qanshalyqty tereń ekenin túsinemin", – dedi kásipker.
Sonymen qatar ol jelide taraǵan jazbanyń ózine tiesili emes ekenin, biraq báribir týyndaǵan jaǵdai úshin jaýapkershilikten qashpaitynyn málimdedi.
Aita keteiik, Smart Coffee Qazaqstanda óz-ózine qyzmet kórsetý formatynda jumys isteitdi. Iaǵni, vending apparaty arqyly kofe satýmen ainalysady.
Kompra.kz deregine súiensek, "Smart Coffee" ataýymen tirkelgen eki kompaniia bar: biri – Almaty oblysy Boraldai kentinde ornalasqan "Smart Coffee" JShS, ekinshisi – Almatydaǵy "Smart Coffee LTD". Olar Damir Voloh pen Artiom Gabdrahmanov esimdi azamattardyń atyna tirkelgen. Kompaniianyń .kz domenindegi resmi saity ýaqytsha istemeidi.
Glinskiidiń ózi kofe arqyly tabys tapqan kásipker retinde tanymal. Ol bir shynaiaq kofeni 100 rýblge (shamamen 500 teńge) satyp, 18 million rýbl paida tapqanyn aityp júr.
Eske salaiyq, biyl qańtarda Astanadaǵy Qazaq Coffee kofehanasy da daýly pikirden soń jabylǵan bolatyn. Sol kezde astanalyq turǵyn Qairat Ibraev kofehanadan qazaqsha mázir surap, bolmaǵan soń shaǵymyn 2GIS qosymshasyna jazǵan. Oǵan ákimshilik qyzmetkeri: "Qyzmetkerlerimiz qazaqsha sóileýge mindetti emes", – dep jaýap qatqan. Bul pikir qoǵamda úlken narazylyq týǵyzyp, áleýmettik jelide ult pen tilge degen qurmet máselesin qaita kótergen edi. Nátijesinde, Qazaq Coffee óz jumysyn toqtatty.
