Qazaqstannyń tuńǵysh bas múftii Rátbek qajy Nysanbaiuly ómirden ótti, dep habarlaidy Dalanews.kz.
Bas múfti Naýryzbai qajy Taǵanuly elimizdiń tuńǵysh bas múftii Rátbek qajy Nysanbaiuly qaitys bolýyna bailanysty marqumnyń otbasyna kóńil aitý jedelhatyn joldady.
"Qazaqstannyń tuńǵysh múftii Rátbek qajy Nysanbaiuly haziretimiz qaitys boldy degen qaraly habar meniń de janyma qatty batty. Jýyrda ǵana Rátbek ustazdyń úiinde bolyp, ahýal surasyp, suhbattasqan edik. Aqsaqaldyń dám-tuzy taýsylǵan eken. Alla aldynan jarylqasyn. Imany ózine serik bolsyn. Ózimniń jáne Qazaqstan musylmandary dini basqarmasy ujymy atynan marqumnyń otbasyna, týǵan-týystaryna, elimizdegi barsha musylman qaýymyna kóńil aitamyn. Marqumnyń máńgilik mekeni jánnat bolǵai. Rátbek haziretimiz múfti bolǵan jyldary musylman memleketterimen tyǵyz qarym-qatynas ornatyp, yntymaqtastyqty arttyra tústi. Qazaqstan musylmandary dini basqarmasynyń irgetasyn qalaǵan Rátbek Nysanbaiuly ózi basqarǵan merzim ishinde 30-dan asa meshit saldyrýǵa yqpal etti", - dedi QMDB tóraǵasy, bas múfti Naýryzbai qajy Taǵanuly.
Aita keteiik, 1990 jyly 12 qańtarda Almatyda Qazaqstan musylmandarynyń I quryltaiy ótip, Qazaqstan musylmandary dini basqarmasy quryldy. QMDB Tashkenttegi Orta Aziia jáne Qazaqstan musylmandary dini basqarmasynan (SADÝM) bólinip, derbes Dini basqarma boldy. QMDB-nyń alǵashqy tóraǵasy, bas múfti bolyp Rátbek qajy Nysanbaiuly sailandy.
Rátbek qajy 2000 jylǵa deiin Dini basqarmany basqarǵan.
