Qazaqstannyń kúshtik qurylymdaryn basqaratyn tulǵalardyń basym kópshiligi reseishil. Reseidiń áskeri mektepterinde tálim alǵan olar "orys áleminen" ózgeni moiyndamaidy.
Bul týraly UQK-nyń tóraǵasy Álnur Musaev britandyq BBC agenttigine bergen suhbatynda aitty dep habarlaidy Dalanews.kz.
Reseidiń Qazaqstanǵa basyp kirý múmkindigine boljam jasaǵan Musaev Ýkrainamen soǵysta ábden qaljyraǵan Kremldiń mundai qadamǵa bararyna kúmánmen qaraidy.
"Ýkraina osy kúnge deiin pisip-jetilip, kemeline kelgen Resei agressiiasyn bir ózi qabyldap aldy. Pýtinniń shapqynshylyǵy tyǵyryqqa tirelip, sharasyzdyqqa ulasyp jatyr. Kremldiń Qazaqstanǵa basyp kirerlik qulqy da, qaýqary da joq. Iá, elimizdiń teriskeiine kóz alartqan qaýipti málimdemeler Qazaqstan táýelsizdik alǵaly tolastaǵan emes. Dese de, Máskeý budan aryǵa barmaidy. Jar degendegi jalǵyz odaqtasynan aiyrylǵandy qalamaidy", – deidi Musaev.
Onyń pikirinshe qazaqstandyqtar ýkrain halqy sekildi saiasi belsendi emes, Kremlmen aradaǵy túrli kelispeýshilikterge kóbine-kóp selqos qaraidy. El ishinde Reseidi jaý sanaityn ultshyl kózqarastaǵy aýditoriiany sonshalyqty aýqymdy deýge taǵy kelmeidi.
Eń qaýiptisi – Qazaqstannyń kúshtik qurylymdarynda, sonyń ishinde Ishki ister salasy, UKQ, Qorǵanys ministrliginde Máskeýdi ǵana moiyndaityn, Reseidiń aitqanyn eki etpeitin tulǵalar otyr.
"Ókinishke orai, qoldan keler qairan joq. Áskeri qurylymdardyń basshy-qosshylary basynan baqaiyna deiin reseishil, máskeýshil. Alysqa barmai-aq, Qorǵanys ministrin mysalǵa alaiyq. Ol uzaq ýaqyt Reseide oqydy, reseishil ekenin jasyrmaidy. Qazaqstannyń kúshtik qurylymdary Kremldiń yǵyna jyǵylýǵa jáne Máskeýdiń soiylyn soǵýǵa beiildi, buǵan Toqaevtyń sońǵy málimdemesi de kedergi keltire alǵan joq", – deidi Musaev.
Budan bólek Resei Eýraziialyq odaqqa birikken elderdi túrli memleketaralyq qaýipsizdik uiymdaryna kirgizip, jipsiz bailap tastaǵan. Ishki ister ministrleri men Qorǵanys ministrleriniń keńesi dep atalatyn aty da, zaty da túsiniksiz qurylymdar shyn máninde qaýipsizdik salasyndaǵy Reseidiń yqpalyn keńeite túsýdi kózdeidi. Bulardyń budan ózge muraty joq.
Sovet ókimetiniń shekpeninen shyqqan elderdi alysqa uzatpai, ýysynda ustaý arqyly olardy Batys áleminen oqshaýlaýdy maqsat tutady.
Sói degen Musaev túneýkúngi Peterbor forýmynda Reseidiń kózqarasyna qaishy keletin málimdeme jasaǵan Toqaevtyń sózine sezikpen qaraitynyn aitypty.
"Menińshe, bul aldyn-ala daiyndalǵan dúnie. Toqaev Pýtinge qarailap otyrdy. Júzinde "durys aittym ba?" degen saýal turǵandai sezildi. Men buǵan tolyq senimdi emespin, dese de sondai kúdigim bar.
Anyǵy, Aqorda Kremlge ashyq túrde qarsy kele almaidy.
Iá, Ýkrainaǵa soǵys ashqan Pýtinniń álsirep qalǵany ras. Sanktsiialar Máskeýdiń túbine jetpese de, ábden tityqtatyp, ekonomikalyq ál-qýatyn sarqyp tynady.
Pýtinniń basqynshy saiasaty órkenietti álemniń qarsylyǵyna uryndy. Resei ekonomika ǵana emes, saiasi alańda da, diplomatiia salasynda da oisyrai utylyp jatyr. Toqaev kánigi diplomat retinde muny kórip-bilip otyr. Bir jaǵynan Peterbordaǵy batyl málimdemesi sonymen de bailanysty bolýy múmkin...", – deidi Musaev.
