Eýropalyq Qaita qurý jáne damý bankiniń (EQDB) boljamy boiynsha, Qazaqstannyń jalpy ishki ósimi 2025 jyly 5,7%-dy qurap, al 2026 jyly 4,5%-ǵa deiin baiaýlaidy. Negizgi qaýip-qater táýekelderdiń ishinde sarapshylar munai tasymalynda reseilik infraqurylymǵa shamadan tys táýeldilik pen álemdik naryqtaǵy shikizat baǵasynyń qubylmalylyǵyn basa atap kórsetedi, dep habarlaidy Dalanews.kz.
"Óńirlik ekonomikalardyń perspektivalary" atty makroekonomikalyq esepte Ortalyq Aziianyń eń iri ekonomikasy Qazaqstan dep kórsetiledi. Bizdiń memleketimizdiń Teńiz ken ornyndaǵy munai óndirisi kólemin ulǵaitýdyń arqasynda 2025 jyly senimdi kórsetkishterge ie bolyp otyrǵany da aitylady. Damý bankiniń málimeti boiynsha, 2025 jyldyń alǵashqy alty aiynda óndiris kólemi 11,6%-ǵa ósip, ónerkásiptik óndiristiń ósimine, qubyr arqyly tasymal men kóterme saýdanyń jandanýyna yqpal etti. Qurylys sektory da qarqyndy damýdy kórsetip, jyldyq kórsetkish boiynsha 2025 jyldyń birinshi jartyjyldyǵynda 18,4%- ǵa deiin jedeldedi. Buǵan iri infraqurylymdyq jobalar, kommýnaldyq jelilerde júrigizilgen jóndeý jumystary, sondai-aq turǵyn úi jáne bilim berý obektilerin jańǵyrtý jáne qarqyndy qurylys yqpal etti. Shyǵyndar jaǵynan ósim tutyný men investitsiianyń joǵary deńgeiimen qamtamasyz etildi. Tutynýshylyq nesieleýdiń turaqty ósiminiń arqasynda tutynýshylyq shyǵyndar kólemi áli de joǵary: jyldyq ósim - 31%.
EQDB Qazaqstan, Qyrǵyzstan, Mońǵoliia, Tájikstan, Túrikmenstan, Ózbekstandy qosa alǵanda, Ortalyq Aziia elderiniń ekonomikasy 2025 jyly orta eseppen 6,1%-ǵa ósedi dep boljaidy.
"Bul senimdi ósimdi ónerkásiptik óndiristiń joǵary deńgeii, turaqty ishki suranys, investitsiialar, naqty jalaqynyń ósýi jáne aitarlyqtai aqsha aýdarymdarynyń aǵyny qoldady. Bul ekonomikalardyń 2026 jylǵa arnalǵan boljamy pozitivti dep sanalady, biraq ósim 5,2% -ǵa deiin baiaýlaidy dep kútiledi. Esepte turaqty ósimniń negizgi qaýipteri retinde basty taýarlar baǵasynyń qubylmalylyǵy, aqsha aýdarymdaryna degen táýeldilik jáne Resei men Qytai naryqtaryna táýeldiliktiń saqtalýy atap kórsetiledi", - deidi EQDB.
Buǵan deiin habarlanǵandai, 2025 jyldyń segiz aiynda Qazaqstannyń JIÓ ósimi 6,5%-dy qurady. Ósimniń negizgi faktory saýda, ónerkásip jáne bailanys salasyndaǵy oń dinamika boldy. 2025 jyldyń jeti aiynda Qazaqstannyń JIÓ ósimi 6,3%-dy qurady. Ol kezdegi ósimge kólik jáne qoima 22,5%-ǵa, qurylys 18,5%-ǵa, kóterme jáne bólshek saýda 8,6%-ǵa, taý-ken ónerkásibi 8,5%-ǵa jáne óńdeý ónerkásibi salalary 6,1%-ǵa ósý arqyly úlken úles qosty. Birinshi jartyjyldyqtyń qorytyndysy boiynsha, Qazaqstannyń JIÓ kórsetkishi 6,2% boldy. QR Úkimeti 2025 jyldyń qorytyndysy boiynsha atalǵan kórsetkishti 6% deńgeiinde igerýdi josparlap otyrǵanyn málimdegen. 2026 jyldyń qorytyndysy boiynsha ekonomikalyq ósim 5,4% deńgeiinde bolady dep kútiledi.
