Qazaqstannyń jasandy intellektini damytý baǵyty Qytaimen yntymaqtastyqqa jańa múmkindikter ashady. Bul týraly Qytai Halyq Respýblikasynyń Qazaqstan Respýblikasyndaǵy tótenshe jáne ókiletti elshisi Han Chýnlin pikir bildirdi, dep habarlaidy Dalanews.kz.
«Bizdiń elderimizdiń basshylary biyl eki ret kezdesti jáne kóptegen mańyzdy kelisimderge qol jetkizdi. Olar birge ekijaqty yntymaqtastyqqa qatysty kóptegen qujattarǵa qol qoidy. Munyń bári Qazaqstan men Qytai arasyndaǵy qatynastardy jańa, odan da joǵary deńgeige shyǵardy. Jaqynda prezident Toqaev óz Joldaýynda Qazaqstannyń odan arǵy damý baǵytyn jasandy intellektpen bailanystyrdy. Men bunyń jasandy intellekt, jasyl damý jáne tsifrlandyrý salasyndaǵy ekijaqty yntymaqtastyqqa jańa múmkindikter ashatynyna senimdimin», – dedi Han Chýnlin seisenbi kúni Astanada.
Elshi Beijiń shet tilderi ýniversitetiniń Qazaqstandaǵy filialynda Qytai Halyq Respýblikasynyń qurylý kúni men Kúzgi ai merekesine arnalǵan is-sharaǵa qatysty. Shara aiasynda «Kórkem Qytai» atty fotokórme men sheberlik sabaqtary ótti.
Astana halyqaralyq ýniversitetiniń prezidenti Serik Irsaliev te Qazaqstan men Qytai arasyndaǵy qarym-qatynastardyń nyǵaiýyna toqtaldy. Ol Qazaqstanda qytai tiliniń oqytýshylaryn kóbirek daiarlaý josparlanyp otyrǵanyn, onyń ishinde joǵary oqý oryndary úshin de mamandar qajet ekenin aitty.
«Búginde qos diplomdyq baǵdarlamada 91 stýdent bilim alýda, onyń ishinde 77-si – grant negizinde. Foundation baǵdarlamasyna 151 stýdent qabyldandy. (…) Jaqynda Astana halyqaralyq ýniversiteti bizdiń filial bazasynda magistratýra baǵdarlamasyn iske qosý týraly kelisimge qol qoidy. Bul qadam joǵary bilikti mamandardy daiarlaýǵa jańa múmkindikter ashyp, qazaqstan-qytai bilim berý yntymaqtastyǵynyń kókjiegin aitarlyqtai keńeitedi», – dep atap ótti Irsaliev.
Eske salsaq, Beijiń shet tilderi jáne mádenieti ýniversitetiniń filialy 2024 jyldyń kúzinde Astana halyqaralyq ýniversitetiniń bazasynda ashylǵan bolatyn.
