Qazaqstannyń taǵy eki qalasynda – Oral men Semeide – jergilikti bilik turǵyndarǵa saiasi qýǵyn-súrgin men asharshylyq qurbandaryn eske alý maqsatynda beibit sherý ótkizýge ruqsat bergen joq, dep habarlaidy Dalanews.kz.
“Kórsetilgen aýmaqta qalalyq ekologiialyq aktsiia ótkizý josparlanǵanyna bailanysty ruqsat berilmeidi. Azamatty sharany óz betinshe uiymdastyrǵan jaǵdaida jaýapkershilikke tartylatyny týraly eskertý jasalsyn”, – delingen Semei qalasy ákimdiginiń jaýabynda.
QazTAG málimetinshe, Oral qalasynyń eki turǵyny 31 mamyrda beibit sherý ótkizý týraly ótinish bergen bolatyn. Alaida qalanyń ishki saiasat bóliminen kelgen resmi jaýapta naqty sebep kórsetilmegen. Tek ákimdik otyrysynyń qorytyndysy boiynsha sherý ótkizýge ruqsat berilmeitini jóninde qaýly qabyldanǵany aitylǵan.
Buǵan deiin de belsendi azamattardyń ótinishteri boiynsha Astana, Óskemen, Shymkent, Pavlodar jáne Petropavl qalalarynda osyndai sharalarǵa ruqsat berilmegen. Bas tartý sebepteri ártúrli: birinde – erejeniń tolyq kórsetilmeýi, endi birinde – ótinish berilgen orynnyń bos bolmaýy. Keibir belsendilerge beibit jiyndy óz betinshe ótkizgen jaǵdaida zań boiynsha jaýapkershilikke tartylatyny, tipti qamaýǵa alynýy múmkin ekeni eskertilgen.
Aita keteiik, Qazaqstanda 1997 jyly 31 mamyr – Saiasi qýǵyn-súrgin jáne asharshylyq qurbandaryn eske alý kúni bolyp jariialanǵan. 2012 jyly dál osy kúni el astanasynda asharshylyq qurbandaryna arnalǵan monýment ashylǵan edi.
