قازاقستاننىڭ تاعى ەكى قالاسىندا – ورال مەن سەمەيدە – جەرگىلىكتى بيلىك تۇرعىندارعا ساياسي قۋعىن-سۇرگىن مەن اشارشىلىق قۇرباندارىن ەسكە الۋ ماقساتىندا بەيبىت شەرۋ وتكىزۋگە رۇقسات بەرگەن جوق، دەپ حابارلايدى Dalanews.kz.

“كورسەتىلگەن اۋماقتا قالالىق ەكولوگيالىق اكسيا وتكىزۋ جوسپارلانعانىنا بايلانىستى رۇقسات بەرىلمەيدى. ازاماتتى شارانى ءوز بەتىنشە ۇيىمداستىرعان جاعدايدا جاۋاپكەرشىلىككە تارتىلاتىنى تۋرالى ەسكەرتۋ جاسالسىن”، – دەلىنگەن سەمەي قالاسى اكىمدىگىنىڭ جاۋابىندا.

قازتاگ مالىمەتىنشە، ورال قالاسىنىڭ ەكى تۇرعىنى 31 مامىردا بەيبىت شەرۋ وتكىزۋ تۋرالى ءوتىنىش بەرگەن بولاتىن. الايدا قالانىڭ ىشكى ساياسات بولىمىنەن كەلگەن رەسمي جاۋاپتا ناقتى سەبەپ كورسەتىلمەگەن. تەك اكىمدىك وتىرىسىنىڭ قورىتىندىسى بويىنشا شەرۋ وتكىزۋگە رۇقسات بەرىلمەيتىنى جونىندە قاۋلى قابىلدانعانى ايتىلعان.

بۇعان دەيىن دە بەلسەندى ازاماتتاردىڭ وتىنىشتەرى بويىنشا استانا، وسكەمەن، شىمكەنت، پاۆلودار جانە پەتروپاۆل قالالارىندا وسىنداي شارالارعا رۇقسات بەرىلمەگەن. باس تارتۋ سەبەپتەرى ءارتۇرلى: بىرىندە – ەرەجەنىڭ تولىق كورسەتىلمەۋى، ەندى بىرىندە – ءوتىنىش بەرىلگەن ورىننىڭ بوس بولماۋى. كەيبىر بەلسەندىلەرگە بەيبىت جيىندى ءوز بەتىنشە وتكىزگەن جاعدايدا زاڭ بويىنشا جاۋاپكەرشىلىككە تارتىلاتىنى، ءتىپتى قاماۋعا الىنۋى مۇمكىن ەكەنى ەسكەرتىلگەن.

ايتا كەتەيىك، قازاقستاندا 1997 جىلى 31 مامىر – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى بولىپ جاريالانعان. 2012 جىلى ءدال وسى كۇنى ەل استاناسىندا اشارشىلىق قۇرباندارىنا ارنالعان مونۋمەنت اشىلعان ەدى.