Resei Qaýipsizdik keńesi tóraǵasynyń orynbasary, Reseidiń eks-prezidenti Dmitrii Medvedevtiń «VKontakte» jelisindegi paraqshasynda: «Qazaqstan «jasandy memleket» degen jazba jariialaǵan.
«Keńes Odaǵy ydyraǵanǵa deiin Soltústik Qazaqstan halqynyń 62.5%-yn slaviandar qurady. Qazaqstan - jasandy memleket, burynǵy orys territoriialary. Mysaly Gýrev, Semei, tipti Almaty qalalary 1924 jylǵa deiin Vernyi dep ataldy. Qazirgi ýaqytta Qazaqstan biligi respýblika ishinde túrli etnostyq toptardy kóshirý jónindegi bastamalardy iske asyra bastady, muny orystarǵa jasalǵan genotsid dep baǵalaýǵa bolady. Biz buǵan kóz juma almaimyz. Orystar kelmeiinshe, tártip ornamaidy…», - dep jazdy Medvedev.
Medvedevtiń atynan jariialanǵan jazbada: «Bir kezderi alpaýyt, qýatty Keńes Odaǵynda ómir súrgen barlyq halyq qaitadan dostyq pen ózara birlikke kelip birge ómir súredi» jáne «Kiev pen Kishi Reseidiń barlyq aýmaqtary azat etilgennen keiin Resei myń jyl burynǵy Orys memleketi siiaqty qaitadan jeńilmeitin, birtutas, kúshti memleketke ainalady», dep jazylǵan.
Óz kezeginde Azat Perýashev: "Feik bolmasa, bul ne sonda? Aýrý sananyń sandyraǵy ma, álde, abaisyzda aýyzdan shyqqan jasyryn qiialdar ma? Qalai bolǵanda da, las ári qurmetke laiyq emes áreket", – deidi.
Onyń aitýynsha, Qazaqstannyń jer aýmaǵy qazirgiden de aýqymdy bolǵan. Biraq, qazaq halqy ótkenin buldamaityn, búgingi kúnmen ómir súretin órkenietti ult.
"Úsh júz jyldyq otarlaýǵa" qarsy qazaqtarmen, soltústik óńirlerdi en jailaǵan babalarymyzdyń myń jyldyq tarihynan talai mysaldy keltirýge bolady. Shekarasy qazirgi Qazaqstan aýmaǵynan da aýqymdy bolǵan, bileýshilerinen barlyq qazaq handary taraǵan.
Qazaq handyǵy murageri bolyp tabylatyn Altyn Ordany eske salamyz. Biraq, bul Altyn Ordany qaita quryp, bes júz jyl boiy tólenbegen salyqty talap etý kerek degen sóz emes qoi!
Halyqaralyq quqyq qoldanystaǵy shekaralardyń buzylmaýyn moiyndaýdan týyndaidy. Biz úshin eń bastysy - Qazaqstanda túrli etnos ókilderiniń tatý-tátti ómir súrip jatqany. Eńbek etip, óz memleketi men óz kásipteriniń kúsheiýine qolǵabys qylýda, otbasylaryn quryp, týys tabýda, bala ósirýde. Biz óz ómirimizdi ózimiz durystaimyz.
Biraq, ratsionaldy ýájder mundai provokatsiialardyń avtorlaryna áser etpeitin sekildi, taǵy qaitalaimyn, eger bul feik bolmasa. Qalai bolǵanda da, mundai jariialanymdardyń paida bolýy oiyn emes. Bul toqtaýsyz jýrnalister men jergilikti depýtattardyń sandyraǵy emes. Áńgime kórshi eldiń eks-prezidenti, iaǵni, úlken saiasi tájiribesi bar saiasatker týraly! Bizdiń Syrtqy ister ministrligi jaǵdaidy anyqtap, anyq-qanyǵyn habarlaý kerek", – dep jazypty Perýashev Telegram arnasynda.
