رەسەي قاۋىپسىزدىك كەڭەسى ءتوراعاسىنىڭ ورىنباسارى، رەسەيدىڭ ەكس-پرەزيدەنتى دميتريي مەدۆەديەۆتىڭ «ۆكونتاكتە» جەلىسىندەگى پاراقشاسىندا: «قازاقستان «جاساندى مەملەكەت» دەگەن جازبا جاريالاعان.
«كەڭەس وداعى ىدىراعانعا دەيىن سولتۇستىك قازاقستان حالقىنىڭ 62.5%-ىن سلاۆياندار قۇرادى. قازاقستان - جاساندى مەملەكەت، بۇرىنعى ورىس تەرريتوريالارى. مىسالى گۋريەۆ، سەمەي، ءتىپتى الماتى قالالارى 1924 جىلعا دەيىن ۆەرنىي دەپ اتالدى. قازىرگى ۋاقىتتا قازاقستان بيلىگى رەسپۋبليكا ىشىندە ءتۇرلى ەتنوستىق توپتاردى كوشىرۋ جونىندەگى باستامالاردى ىسكە اسىرا باستادى، مۇنى ورىستارعا جاسالعان گەنوسيد دەپ باعالاۋعا بولادى. ءبىز بۇعان كوز جۇما المايمىز. ورىستار كەلمەيىنشە، ءتارتىپ ورنامايدى…»، - دەپ جازدى مەدۆەديەۆ.
مەدۆەديەۆتىڭ اتىنان جاريالانعان جازبادا: «ءبىر كەزدەرى الپاۋىت، قۋاتتى كەڭەس وداعىندا ءومىر سۇرگەن بارلىق حالىق قايتادان دوستىق پەن ءوزارا بىرلىككە كەلىپ بىرگە ءومىر سۇرەدى» جانە «كييەۆ پەن كىشى رەسەيدىڭ بارلىق اۋماقتارى ازات ەتىلگەننەن كەيىن رەسەي مىڭ جىل بۇرىنعى ورىس مەملەكەتى سياقتى قايتادان جەڭىلمەيتىن، ءبىرتۇتاس، كۇشتى مەملەكەتكە اينالادى»، دەپ جازىلعان.
ءوز كەزەگىندە ازات پەرۋاشيەۆ: "فەيك بولماسا، بۇل نە سوندا؟ اۋرۋ سانانىڭ ساندىراعى ما، الدە، ابايسىزدا اۋىزدان شىققان جاسىرىن قيالدار ما؟ قالاي بولعاندا دا، لاس ءارى قۇرمەتكە لايىق ەمەس ارەكەت"، – دەيدى.
ونىڭ ايتۋىنشا، قازاقستاننىڭ جەر اۋماعى قازىرگىدەن دە اۋقىمدى بولعان. ءبىراق، قازاق حالقى وتكەنىن بۇلدامايتىن، بۇگىنگى كۇنمەن ءومىر سۇرەتىن وركەنيەتتى ۇلت.
"ءۇش ءجۇز جىلدىق وتارلاۋعا" قارسى قازاقتارمەن، سولتۇستىك وڭىرلەردى ەن جايلاعان بابالارىمىزدىڭ مىڭ جىلدىق تاريحىنان تالاي مىسالدى كەلتىرۋگە بولادى. شەكاراسى قازىرگى قازاقستان اۋماعىنان دا اۋقىمدى بولعان، بيلەۋشىلەرىنەن بارلىق قازاق حاندارى تاراعان.
قازاق حاندىعى مۇراگەرى بولىپ تابىلاتىن التىن وردانى ەسكە سالامىز. ءبىراق، بۇل التىن وردانى قايتا قۇرىپ، بەس ءجۇز جىل بويى تولەنبەگەن سالىقتى تالاپ ەتۋ كەرەك دەگەن ءسوز ەمەس قوي!
حالىقارالىق قۇقىق قولدانىستاعى شەكارالاردىڭ بۇزىلماۋىن مويىنداۋدان تۋىندايدى. ءبىز ءۇشىن ەڭ باستىسى - قازاقستاندا ءتۇرلى ەتنوس وكىلدەرىنىڭ ءتاتۋ-تاتتى ءومىر ءسۇرىپ جاتقانى. ەڭبەك ەتىپ، ءوز مەملەكەتى مەن ءوز كاسىپتەرىنىڭ كۇشەيۋىنە قولعابىس قىلۋدا، وتباسىلارىن قۇرىپ، تۋىس تابۋدا، بالا وسىرۋدە. ءبىز ءوز ءومىرىمىزدى ءوزىمىز دۇرىستايمىز.
ءبىراق، راسيونالدى ۋاجدەر مۇنداي پروۆوكاسيالاردىڭ اۆتورلارىنا اسەر ەتپەيتىن سەكىلدى، تاعى قايتالايمىن، ەگەر بۇل فەيك بولماسا. قالاي بولعاندا دا، مۇنداي جاريالانىمداردىڭ پايدا بولۋى ويىن ەمەس. بۇل توقتاۋسىز جۋرناليستەر مەن جەرگىلىكتى دەپۋتاتتاردىڭ ساندىراعى ەمەس. اڭگىمە كورشى ەلدىڭ ەكس-پرەزيدەنتى، ياعني، ۇلكەن ساياسي تاجىريبەسى بار ساياساتكەر تۋرالى! ءبىزدىڭ سىرتقى ىستەر مينيسترلىگى جاعدايدى انىقتاپ، انىق-قانىعىن حابارلاۋ كەرەك"، – دەپ جازىپتى پەرۋاشيەۆ تەلەگرام ارناسىندا.
