Almatyda avtobýstar men ózge de jolaýshylar kóligi úshin ruqsat etiletin eń joǵary jyldamdyqty saǵatyna 50 shaqyrym etip belgileý máselesi qarastyrylyp jatyr. Qalalyq politsiia departamenti osy talapty zańnamaǵa engizý jóninde usynys joldaǵan. Degenmen bastamanyń naqty qashan maquldanyp, qoldanysqa engiziletini ázirge aitylǵan joq, dep habarlaidy dalanews.kz.
Bes.media málimetinshe, mundai usynystyń kóterilýine qoǵamdyq kólik júrgizýshileri tarapynan jol erejesiniń jii buzylýy sebep bolǵan. Biyl jyl basynan beri olardyń qatysýymen 13 myńnan astam zańbuzýshylyq anyqtaldy. Sonyń 11 704-i jyldamdyqty asyrýǵa qatysty. Taǵy 1 591 jaǵdaida júrgizýshiler baǵdarshamnyń qyzyl túsine ótip ketken.
Politsiia dereginshe, qoǵamdyq kólik tizgindegen azamattardyń kólik basqaryp kele jatyp telefon paidalanǵan 51 deregi tirkelgen. Sondai-aq jaiaý júrginshige jol bermeýdiń 10, manevr jasaý talabyn saqtamaýdyń 6 jaǵdaiy anyqtaldy. Budan bólek, taǵy 109 túrli quqyqbuzýshylyq esepke alynǵan.
Qala kóshelerindegi avtomatty baqylaý júieleri de jol erejesiniń jappai buzylatynyn kórsetip otyr. 2026 jyldyń basynan beri kameralar 127 730 zańbuzýshylyqty tirkegen. Al patrýldik politsiia qyzmetkerleri 223 ákimshilik hattama rásimdedi.
Resmi málimet boiynsha, biylǵy segiz aida jolaýshylar kóligi júrgizýshileriniń kinásinen Almatyda 335 jol apaty bolǵan. Sonyń saldarynan tórt adam kóz jumyp, 421 adam jaraqat aldy. Al 2025 jyldyń qorytyndysynda qoǵamdyq kólik júrgizýshileri kináli dep tanylǵan 438 jol-kólik oqiǵasy tirkelip, jeti adam qaza tapqan jáne 537 adam zardap shekken.
Qoǵamdyq kóliktiń qaýipsizdigi arnaiy profilaktikalyq sharalar kezinde de tekseriledi. Mamandar avtobýstardyń tehnikalyq jaǵdaiyn baǵalap, olardyń belgilengen talaptarǵa sáikestigin baqylaidy. Avtopark basshylarymen kezdesýler ótkizilip, júrgizýshilerge jol qaýipsizdigi talaptary túsindiriledi. Buǵan qosa, avtobýstardaǵy beinekameralar arqyly júrgizýshilerdiń áreketi qosymsha baqylaýǵa alynǵan.
