Tájikstan sý tasqyny saldarynan tótenshe jaǵdailardan zardap shekken Qazaqstan halqyna 61 vagon gýmanitarlyq kómek keldi. Atalǵan júk Túrkistan oblysy, Saryaǵash aýdanynyń «Saryaǵash» temir jol stantsiiasyna kelip jetti. Sonymen birge Tájikstannan 15 júk kóligine tielgen kómek te elimizge jetkizildi. Tájikstannan jalpy 3500 tonna gýmanitarlyq kómek qabyldandy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Gýmanitarlyq kómekti Tájikstan Respýblikasynyń Tótenshe jaǵdailar jáne azamattyq qorǵanys komitetiniń tóraǵasy, militsiia general - polkovnigi Rýstam Nazarzoda bastap keldi. Tájikstan Respýblikasynyń Úkimeti janyndaǵy Memlekettik materialdyq resýrstar agenttigi direktorynyń orynbasary Sohib Ziiodýlloev gýmanitarlyq kómek týraly qujatty saltanatty túrde tapsyrdy.
– Qazaqstandaǵy qiyn jaǵdai bizdiń de janymyzǵa batty. Beijai qarap otyra almadyq. Bizdiń elimizde kúrdeli másele týyndasa, eń kóp kómek joldaityn el – Qazaqstan. Sondyqtan Tájikstan Respýblikasynyń Prezidentiniń sheshimimen osy gýmanitarlyq kerýendi jetkizip otyrmyz. Biz strategiialyq seriktes elder retinde bir-birimizdi qoldap turýymyz kerek, – dedi Rýstam Nazarzoda.
Delegatsiiany Qazaqstan Respýblikasy Tótenshe jaǵdailar vitse-ministri Serik Tólenbergenov pen Túrkistan oblysy ákiminiń orynbasary Beisenbai Tájibaev bastaǵan oblys turǵyndary kútip aldy. Saryaǵash aýdanynyń «Saryaǵash» temirjol stantsiiasynda is-shara ótkizildi.
Oblys ákiminiń orynbasary Beisenbai Tájibaev Tájikstan halqyna alǵysyn aityp,rizashylyǵyn bildirdi.
– Búgin mańyzdy jiynda bas qosyp turmyz. Elimizdegi sý tasqynyna bailanysty Tájikstan elinen gýmanitarlyq kómek keldi. Buǵan deiin de Ortalyq Aziiadaǵy baýyrlas elderden kómek kelgen bolatyn. Qyrǵyzstan, Ózbekstannan qoldaý kórsetildi. Búgin Tájikstannan qurylys materialdary men azyq-túlik jetkizilip otyr. Kórshiles elge alǵysymyzdy bildiremiz. Qos memlekettiń dostyǵy máńgi jasai bersin, – dedi oblys ákiminiń orynbasary.
Atalǵan is-sharaǵa Saryaǵash aýdanyndaǵy tájik etnosynyń ókilderi, Saryaǵash aýdanynyń aqsaqaldary men aq jaýlyqty analar da qatysty. Gýmanitarlyq kómekti bastap kelgen Tájikstan Respýblikasynyń ókilderine qurmet kórsetildi. Qurylys materialdary men azyq-túlik tielgen gýmanitarlyq kerýen sý basqan aimaqtarǵa jiberiledi.
