تاجىكستان سۋ تاسقىنى سالدارىنان توتەنشە جاعدايلاردان زارداپ شەككەن قازاقستان حالقىنا 61 ۆاگون گۋمانيتارلىق كومەك كەلدى. اتالعان جۇك تۇركىستان وبلىسى، سارىاعاش اۋدانىنىڭ «سارىاعاش» تەمىر جول ستانسياسىنا كەلىپ جەتتى. سونىمەن بىرگە تاجىكستاننان 15 جۇك كولىگىنە تيەلگەن كومەك تە ەلىمىزگە جەتكىزىلدى. تاجىكستاننان جالپى 3500 توننا گۋمانيتارلىق كومەك قابىلداندى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

گۋمانيتارلىق كومەكتى تاجىكستان رەسپۋبليكاسىنىڭ توتەنشە جاعدايلار جانە ازاماتتىق قورعانىس  كوميتەتىنىڭ ءتوراعاسى، ميليسيا گەنەرال - پولكوۆنيگى رۋستام نازارزودا باستاپ كەلدى. تاجىكستان رەسپۋبليكاسىنىڭ ۇكىمەتى جانىنداعى مەملەكەتتىك ماتەريالدىق رەسۋرستار اگەنتتىگى ديرەكتورىنىڭ ورىنباسارى سوحيب زيودۋللويەۆ گۋمانيتارلىق كومەك تۋرالى قۇجاتتى سالتاناتتى تۇردە تاپسىردى.

– قازاقستانداعى قيىن جاعداي ءبىزدىڭ دە جانىمىزعا باتتى. بەيجاي قاراپ وتىرا المادىق. ءبىزدىڭ ەلىمىزدە كۇردەلى ماسەلە تۋىنداسا،  ەڭ كوپ كومەك جولدايتىن ەل – قازاقستان. سوندىقتان تاجىكستان رەسپۋبليكاسىنىڭ پرەزيدەنتىنىڭ شەشىمىمەن وسى گۋمانيتارلىق كەرۋەندى جەتكىزىپ وتىرمىز.  ءبىز ستراتەگيالىق سەرىكتەس ەلدەر رەتىندە ءبىر-بىرىمىزدى قولداپ تۇرۋىمىز كەرەك،  – دەدى رۋستام نازارزودا.

دەلەگاسيانى قازاقستان رەسپۋبليكاسى توتەنشە جاعدايلار ۆيسە-مينيسترى سەرىك تولەنبەرگەنوۆ پەن تۇركىستان وبلىسى اكىمىنىڭ ورىنباسارى  بەيسەنباي تاجىبايەۆ باستاعان وبلىس تۇرعىندارى كۇتىپ الدى. سارىاعاش اۋدانىنىڭ «سارىاعاش» تەمىرجول ستانسياسىندا ءىس-شارا وتكىزىلدى.

وبلىس اكىمىنىڭ ورىنباسارى بەيسەنباي تاجىبايەۆ تاجىكستان حالقىنا العىسىن ايتىپ،ريزاشىلىعىن ءبىلدىردى.

– بۇگىن ماڭىزدى جيىندا باس قوسىپ تۇرمىز. ەلىمىزدەگى سۋ تاسقىنىنا بايلانىستى تاجىكستان ەلىنەن گۋمانيتارلىق كومەك كەلدى. بۇعان دەيىن دە ورتالىق ازياداعى باۋىرلاس ەلدەردەن كومەك كەلگەن بولاتىن. قىرعىزستان،  وزبەكستاننان قولداۋ كورسەتىلدى.  بۇگىن  تاجىكستاننان قۇرىلىس ماتەريالدارى مەن ازىق-تۇلىك جەتكىزىلىپ وتىر.  كورشىلەس ەلگە العىسىمىزدى بىلدىرەمىز.  قوس مەملەكەتتىڭ دوستىعى ماڭگى جاساي بەرسىن،  – دەدى وبلىس اكىمىنىڭ ورىنباسارى.

اتالعان ءىس-شاراعا سارىاعاش اۋدانىنداعى تاجىك ەتنوسىنىڭ وكىلدەرى، سارىاعاش اۋدانىنىڭ اقساقالدارى مەن اق جاۋلىقتى انالار دا قاتىستى.  گۋمانيتارلىق كومەكتى باستاپ كەلگەن تاجىكستان رەسپۋبليكاسىنىڭ وكىلدەرىنە قۇرمەت كورسەتىلدى. قۇرىلىس ماتەريالدارى مەن ازىق-تۇلىك تيەلگەن گۋمانيتارلىق  كەرۋەن سۋ باسقان ايماقتارعا جىبەرىلەدى.