Qazaqstanda bir ailyq munai óndirisiniń kólemin saqtaityn strategiialyq munai qoimasyn salý úshin 8 milliard dollardan astam qarjy qajet bolýy múmkin. Bul týraly sarapshy Marat Shibýtov «QazMunaiGazdan» alǵan túsindirmege súiene otyryp málimdedi, dep habarlaidy dalanews.kz.
Onyń aitýynsha, mundai qoimany salý úshin árqaisysynyń kólemi 100 myń tekshe metr bolatyn 75 iri rezervýar qajet. Ár rezervýar shamamen 80 myń tonna munai saqtai alady.
Sarapshynyń málimetinshe, jer telimin daiyndaý, jol, qubyr, elektr jelileri jáne basqa da infraqurylymdy qosa eseptegende jobanyń aldyn ala quny 7,5 milliard dollardy quraýy múmkin.
Buǵan qosa, mundai rezervýarlarda tehnologiialyq talaptarǵa sáikes jalpy kólemniń 15%-yna deiingi munai turaqty túrde saqtalýy tiis. Bul shamamen 1 million tonna munaiǵa teń. Al tehnologiialyq qor retinde saqtalatyn munaidyń ózi keminde 600 million dollar turady.
Shibýtovtyń pikirinshe, mundai aýqymdy jobany investorlar qarjylandyrýǵa múddeli emes.
«Ondai jaǵdaida memlekettiń mundai qoimany óz qarajatyna salýynyń qandai máni bar? Onyń ústine jer qoinaýyndaǵy munai ken oryndary tabiǵi qoima qyzmetin atqaryp otyr», – deidi sarapshy.
Onyń baǵalaýynsha, dál osy 8 milliard dollarǵa Eskeneden Mańǵystaýǵa deiin munai qubyryn tartyp, keiin ony Kaspii teńiziniń túbi arqyly Bakýge deiin jalǵastyrýǵa bolady.
Sarapshy sondai-aq Qazaqstanda kólemi 100 myń tekshe metr bolatyn rezervýarlar joq ekenin atap ótti. Onyń sózinshe, mundai nysandar tipti Teńiz jáne Qashaǵan ken oryndarynda da salynbaǵan.
Marat Shibýtov strategiialyq munai qoimasyn salý máselesi Kaspii qubyr konsortsiýmynyń (KQK) jumysyna qatysty qiyndyqtar týyndaǵan saiyn qaita kóteriletinin aitty. Alaida onyń pikirinshe, KQK jumysy toqtaǵan jaǵdaida mundai qoima da máseleni tolyq sheshe almaidy.
