Қазақстанда бір айлық мұнай өндірісінің көлемін сақтайтын стратегиялық мұнай қоймасын салу үшін 8 миллиард доллардан астам қаржы қажет болуы мүмкін. Бұл туралы сарапшы Марат Шибутов «ҚазМұнайГаздан» алған түсіндірмеге сүйене отырып мәлімдеді, деп хабарлайды dalanews.kz.
Оның айтуынша, мұндай қойманы салу үшін әрқайсысының көлемі 100 мың текше метр болатын 75 ірі резервуар қажет. Әр резервуар шамамен 80 мың тонна мұнай сақтай алады.
Сарапшының мәліметінше, жер телімін дайындау, жол, құбыр, электр желілері және басқа да инфрақұрылымды қоса есептегенде жобаның алдын ала құны 7,5 миллиард долларды құрауы мүмкін.
Бұған қоса, мұндай резервуарларда технологиялық талаптарға сәйкес жалпы көлемнің 15%-ына дейінгі мұнай тұрақты түрде сақталуы тиіс. Бұл шамамен 1 миллион тонна мұнайға тең. Ал технологиялық қор ретінде сақталатын мұнайдың өзі кемінде 600 миллион доллар тұрады.
Шибутовтың пікірінше, мұндай ауқымды жобаны инвесторлар қаржыландыруға мүдделі емес.
«Ондай жағдайда мемлекеттің мұндай қойманы өз қаражатына салуының қандай мәні бар? Оның үстіне жер қойнауындағы мұнай кен орындары табиғи қойма қызметін атқарып отыр», – дейді сарапшы.
Оның бағалауынша, дәл осы 8 миллиард долларға Ескенеден Маңғыстауға дейін мұнай құбырын тартып, кейін оны Каспий теңізінің түбі арқылы Бакуге дейін жалғастыруға болады.
Сарапшы сондай-ақ Қазақстанда көлемі 100 мың текше метр болатын резервуарлар жоқ екенін атап өтті. Оның сөзінше, мұндай нысандар тіпті Теңіз және Қашаған кен орындарында да салынбаған.
Марат Шибутов стратегиялық мұнай қоймасын салу мәселесі Каспий құбыр консорциумының (КҚК) жұмысына қатысты қиындықтар туындаған сайын қайта көтерілетінін айтты. Алайда оның пікірінше, КҚК жұмысы тоқтаған жағдайда мұндай қойма да мәселені толық шеше алмайды.
