Gordon qazaq saiasatkeriniń Kreml agressiiasyna qatysty pikirin bilipti.
Máskeýdiń bógde elge basyp kirerin múlde kútpegenin aitqan Jákishev osy arqyly elimizdegi orystildi elitanyń kózqarasyn ortaǵa salǵan eken.
– Soǵys bastalǵan sátte, óz kózime ózim senbei, bir ysynyp, bir sýyndym. Resei 1941 jylǵy fashistik Germaniianyń áreketin ainytpai qaitalady. Dereý Ýkrainada turatyn dostaryma habarlasyp, qal-jaiyn suradym.
Pýtin eshkimge soqtyqpai, jai jatqan elge soqtyqty. Onyń oilap tapqan syltaýyna qarap eriksiz ezý tartasyń. Naǵyz "natsister" Reseidiń ózinde otyr.
Ýkrainanyń parlamentinde orysty jer betinen joiyp jiberýge úndep otyrǵan birde bir partiia joq. Olardyń Zelenskii týraly sandyraǵyna aqyl-esi túzý adam senbeidi, – deidi ol.
Muhańnyń paiymdaýynsha, Kiev Máskeýge qarsy kele almai, tize búkken bolsa, Kreml kelesi kezekte Qazaqstanǵa aýyz salar edi.
– Ýkraina Pýtin aitqandai 3 kúnniń ishinde berilgen bolsa, Jańa Qazaqstan qazirgi kúni Reseidiń bodanynda bolar edi. Buǵan daiyn dálelim bar.
Kreml ideologtary orys qoǵamyn Qazaqstanǵa shabýyl jasaýǵa daiyndai bastady. Soǵystyń qarsańynda Ziýganov bastaǵan kommýnister Qazaqstanǵa kúie jaǵyp, provokatsiiaǵa toly málimdeme jasaǵanyn umyta qoiǵan joqpyz. Kommýnister qazaq biligine aqylǵa syimaityn aiyp taqty. Orystar qýǵyn-súrgin kórip, orys tili qysymǵa ushyraýda dep qońyrsydy.
Osylaisha Qazaqstanǵa basyp kirýdiń alǵysharty jasalyp jatqan edi. Zelenskii bastaǵan ýkrain biligi Pýtinniń "Barbarossa" josparyn kúl-parsha etti", – deidi Jákishev.
Kreml kósemimen júzdesip qana qoimai, onyń betin qaitarǵan Jákishev saiasatqa endi aiaq basqan shaǵynda Pýtinniń jasyq minezdi bolǵanyn aitady.
– Ony eń alǵash Eltsinmen ilesip kelgen kezde kórdim. Nazarbaevtyń astyna kópshik tóseýmen boldy. Nazarbaevtyń tulǵasyna tamsanyp, qol-aiaǵyn jerge tigizbei maqtaǵanyna kýá bolǵanmyn.
Keiin prezident bolǵanynda Qazaqstandy Reseidiń provintsiiasy dep qaraitynyn ańǵardym. Onyń imperlik ambitsiiasy eshqashan júzege aspaidy. Ýkrainany kúshpen ustaimyn dese qatelesedi. Reseidiń áskeri óndiristik keshenine qarsy turýda Batystan keletin kómektiń mólsheri mańyzdy, – deidi saiasatker.
