Qazaqstanda uialy telefondardy tekserý men rastaý (verifikatsiia) isi memleket quzyretine berilýi múmkin, dep habarlaidy dalanews.kz.
Májilis baspasóz qyzmetiniń málimetinshe, maquldanǵan zań jobasynda abonenttik qurylǵylardy verifikatsiialaý salasyna memlekettik monopoliia engizý qarastyrylǵan. Bul mindetti Memlekettik radiojiilik qyzmetine berý usynylǵan.
Depýtattardyń aitýynsha, mundai ózgeris azamattarǵa satyp alǵan telefonynyń túpnusqa ári sapaly ekenine kepildik berýge múmkindik beredi. Sonymen qatar bul shara qoǵamdyq jáne jeke qaýipsizdikti kúsheitip, naryqtaǵy adal básekeni qalyptastyrýǵa, baǵanyń ashyq bolýyna jáne kedendik baqylaýdy kúsheitýge yqpal etpek. Sondai-aq uialy telefon urlyǵynyń sanyn azaitýǵa kómektesedi.
Zań jobasynda budan bólek, telefon alaiaqtyǵynyń aldyn alý jáne onyń jolyn kesý úshin aqparattyq-taldaý jumystaryn kúsheitý kózdelgen. Sondai-aq derekterdi óńdeý ortalyqtarynyń infraqurylymyn damytý jáne telekommýnikatsiia salasyna jańa tehnologiialardy engizý josparlanyp otyr.
Oǵan qosa, halyqaralyq trafikti ortalyqtandyrylǵan telekommýnikatsiialyq basqarý júielerin ainalyp ótpei ótkizý tártibi naqtylanyp, ruqsat etilmegen trafikti ótkizýge jáne bailanys jelilerin zańsyz paidalanýǵa tyiym salý usynylǵan.
