Májilis pedagog mártebesi, bilim berý, densaýlyq saqtaý jáne bala quqyqtaryn qorǵaý máseleleri jónindegi zańdy ekinshi oqylymda qabyldady, dep habarlaidy dalanews.kz.
Zań Memleket basshysynyń pedagogterdiń quqyqtary men múddelerin zańnamalyq deńgeide qorǵaýdy kúsheitý jónindegi tapsyrmasy aiasynda ázirlengen.
Qujattaǵy eń mańyzdy ózgeristerdiń biri - muǵalimderdiń jaýapkershiligin sabaq ýaqytymen ǵana shekteý boldy. Osyǵan deiin qoǵamda mektep oqýshylaryna qatysty túrli oqiǵalardan keiin muǵalimder men mektep direktorlary sabaqtan tys ýaqytta bolǵan jaǵdailar úshin de jaýapqa tartylyp kelgen.
Bul máseleni Májilis depýtaty, eks-bilim ministri Ashat Aimaǵambetov birneshe ret kótergen bolatyn. Onyń aitýynsha, elde sońǵy jyldary muǵalimderge artyq jaýapkershilik júktelip ketken.
«Jazǵy demalys kezinde, túngi ýaqytta nemese demalys kúnderi bolǵan jaǵdailar úshin muǵalimderdi jazalaý durys emes. Ókinishke qarai, bizde mundai tájiribe boldy. Oqýshy kóshede tóbelesse de, túnde bir jaǵdaiǵa tap bolsa da, eń aldymen mektep direktoryn nemese synyp jetekshisin kinálaýǵa tyrysady. Bul ádiletsiz», - dedi Aimaǵambetov Májilis kýlýarynda.
Depýtattyń sózinshe, muǵalimniń mindeti sapaly bilim berý men tárbie jumysy, al ata-analardyń jaýapkershiligin eshkim almastyrmaýy kerek.
«Kanikýl, keshki ýaqyt, demalys kúnderi bul ata-ananyń tikelei jaýapkershiligi. Muǵalim bárine táýlik boiy jaýap berýge mindetti emes. Biz pedagogti baqylaýshy organǵa ainaldyryp jiberdik. Sonyń kesirinen muǵalimniń negizgi jumysy ekinshi orynǵa túsip qaldy», - dedi depýtat.
Zańdaǵy ózgerister tek jaýapkershilik máselesimen shektelmeidi. Qujatta muǵalimderdi artyq biýrokratiialyq júktemeden qorǵaýǵa baǵyttalǵan normalar da engizilgen.
Endi pedagogterden bir esepti qaǵaz jáne elektrondy formatta qatar júrgizý talap etilmeidi. Sonymen birge mektepterde uialy telefondardy paidalaný boiynsha biryńǵai erejeler engiziledi.
Ashat Aimaǵambetov buǵan deiin muǵalimderdiń WhatsApp chattaryndaǵy shamadan tys júktemesin de synǵa alǵan edi.
«Keibir muǵalimder táýligine ondaǵan chatta otyrady. Túnde ata-analar jazady, demalysta habarlasady. Muǵalimniń de jeke ómiri bar. Ol sabaqtan keiin mindetti túrde WhatsApp-ta jaýap berýge tiis emes», - degen bolatyn depýtat.
Onyń pikirinshe, mektepterde bailanysqa arnalǵan resmi tsifrlyq platformalar bolýy qajet, al pedagogterdiń jeke telefon nómiri barshaǵa qoljetimdi bolmaýy tiis.
Zań aiasynda ata-analardyń jaýapkershiligi de keńeitildi. Balalardyń ómiri, densaýlyǵy men qaýipsizdigine qatysty mindetter endi naqtyraq bekitiledi.
Sonymen qatar qujatta Qazaqstanda sheteldik jetekshi ýniversitetterdiń filialdaryn ashýǵa qatysty normalar qarastyrylǵan. Olar tek memlekettik bilim berý standarttaryn saqtaǵan jaǵdaida ǵana jumys istei alady.
Budan bólek, joǵary meditsinalyq bilim berý júiesine ózgerister engizildi. Endi integratsiialanǵan model boiynsha stýdentter 6 jyl joǵary oqý ornynda bilim alyp, keiin 1 jyl tolyqqandy internatýradan ótedi. Oqýdy aiaqtaǵan túlekter meditsinalyq praktikamen ainalysý quqyǵyna ie bolady.
