Májiliste derbes derekterdi qorǵaý jáne kiberqaýipsizdikke qatysty jańa túzetýler tanystyryldy, dep habarlaidy dalanews.kz.
Túzetýlerdiń jeke blogy azamattardyń derbes derekterin qorǵaýǵa arnalǵan. Májiliste bul ózgerister Konstitýtsiiadaǵy jeke derekterdi qorǵaý normalaryn kúsheitý úshin ázirlengeni aityldy.
«Zań jobasynda derbes derekter operatorlarynyń klassifikatsiiasy engiziledi. Olar óńdeletin aqparat kólemine jáne syn-qaterler deńgeiine qarai shaǵyn, orta jáne iri bolyp bólinedi. Tiisinshe, mundai operatorlarǵa qoiylatyn talaptar da ártúrli bolady. Osylaisha, derbes derekter salasynda syn-qaterge baǵdarlanǵan retteý modeli engiziledi», - delingen Májilis habarlamasynda.
Depýtattardyń aitýynsha, bul júie iri platformalar men kóp kólemde derek óńdeitin uiymdarǵa baqylaýdy kúsheitýge múmkindik beredi.
«Sondai-aq taralyp ketken derbes derekter tizilimi engiziledi. Memlekettik aqparattyq júie aiasynda árbir azamat óziniń qai derbes deregi ashyq qoljetimdilikte bolýy múmkin ekenin nemese tarap ketýge bailanysty qiyndyqqa ushyraýy yqtimal ekenin teksere alady. Bul adamdarǵa óz derekterin qorǵaý boiynsha der kezinde shara qabyldaýǵa jol ashady», - dep habarlady Májilis.
Zań jobasynda derbes derekterdi jariialaý jáne almasý kezinde qorǵaý talaptaryn kúsheitý de qarastyrylǵan.
«Atap aitqanda, qujattardy ashyq jariialaý mindetti bolǵan jaǵdaida derbes derekterdi búrkeý jáne hesh-kod paidalaný, sondai-aq operatorlar arasynda almasý kezinde derbes derekterdi shifrlaý týraly talaptar engiziledi», - delingen habarlamada.
Sonymen qatar azamattardyń jeke derekterin ashyq jariialaýǵa kelisim berý tártibi de ózgeredi.
«Endi kelisimde adamnyń óz derbes deregin ashyq jariialaýǵa ruqsat beretini ne bermeitini bólek kórsetilýge tiis», - dep habarlady Májilis.
Budan bólek, tsifrlyq infraqurylymnyń asa mańyzdy obektilerine memlekettik baqylaý jasaý fýnktsiialaryn qaita bólý usynylǵan.
Májilis málimetinshe, tsifrlyq obektilerdi basqarý saiasaty Jasandy intellekt jáne tsifrlyq damý ministrliginde qalady. Al memlekettik baqylaý fýnktsiialaryn Ulttyq qaýipsizdik komitetine berý kózdelip otyr.
