Baiqońyrda tatý sheberi bolyp jumys istegen Qazaqstan azamaty Resei aýmaǵynda tyńshylyq jasady degen kúdikpen ustaldy, dep habarlaidy dalanews.kz.
Bul týraly Adam quqyqtary jónindegi halyqaralyq federatsiia (FIDH) habarlady.
Aqparatqa sáikes, qazaqstandyq Reseidiń Ýkrainaǵa qarsy áskeri is-qimylyn ashyq qoldamaǵan jáne osyǵan bailanysty Resei jaǵynda soǵysqan jergilikti turǵyndardyń birimen arada janjal týyndaǵan. Keiin ony Reseidiń Orynbor qalasyndaǵy fitnes-ortalyqtyń qabyrǵasyna sýret salyp berý týraly usynyspen shaqyrǵan. Resei aýmaǵyna barǵan soń ol quqyq qorǵaý organdary tarapynan ustalǵan.
Tergeý nusqasyna sáikes, qazaqstandyq Reseidiń áskeri bólimderiniń ornalasýy týraly málimetti ýkrainalyq blogerge bergen degen kúdikke ilingen. Qazir ol Orynbordaǵy tergeý izoliatorynda qamaýda otyr. Ustalǵan azamattyń jubaiynyń aitýynsha, is boiynsha negizgi dálel retinde áskeri bólimder týraly málimetter kórsetilgen kesteniń skrinshoty usynylǵan. Alaida onyń bul aqparatty elektrondyq poshta, messendjer nemese basqa bailanys quraldary arqyly joldaǵanyn dáleldeitin aiǵaqtar joq.
Sondai-aq áieliniń málimdeýinshe, ustalǵannan keiin azamat azaptaýǵa ushyraǵan. Buǵan qosa, onyń densaýlyǵynda burynnan bar máseleler de bar ekeni aityldy.
Eske salaiyq, buǵan deiin Germaniiada Resei úshin tyńshylyq jasady degen kúdikpen Qazaqstan azamaty ustalǵan bolatyn.
