Jetisý oblysy boiynsha Saýda jáne tutynýshylardyń quqyqtaryn qorǵaý departamenti sot tártibimen uialy bailanys pen internet qyzmetiniń sapasyz kórsetilýinen zardap shekken turǵyndardyń aqshasyn qaitaryp berdi, dep habarlaidy Dalanews.kz.
Taldyqorǵan qalalyq sotynyń 2026 jylǵy 13 qańtardaǵy uiǵarymymen oblystyń bir aýdanynda turatyn azamattardyń ujymdyq shaǵymy negizinde qozǵalǵan rezonansty is aiaqtaldy.
Sot barysynda tutynýshylar uzaq ýaqyt boiy elimizdegi iri bailanys operatorlarynyń biriniń «otbasylyq tarifi» boiynsha uialy bailanys pen mobildi internet qyzmeti úshin turaqty túrde aqy tólep kelgeni anyqtalǵan. Sonymen qatar, kelisimshart aiasynda smartfondar da satyp alynǵan.
Ai saiynǵy abonenttik tólem mólsheri 11 670 teńgeden joǵary bolǵan.
Alaida 2025 jylǵy 10 qazan men 19 qarasha aralyǵynda, iaǵni 41 kún boiy, bailanys pen internet qyzmeti tiisti deńgeide kórsetilmegen.
- bailanys turaqsyz bolǵan,
- internet jelisine qoljetimdilik is júzinde bolmaǵan.
Soǵan qaramastan operator abonenttik tólemdi tolyq kólemde alýdy jalǵastyrǵan. Bul jaǵdai kelisimshart mindettemeleriniń oryndalmaǵanyn kórsetedi.
Sapasyz bailanys turǵyndarǵa eleýli qiyndyq týdyrǵan:
- eresekter memlekettik organdar men jedel qyzmetterge habarlasa almaǵan;
- oqýshylar 41 kún boiy úi tapsyrmalaryn tolyq oryndaý jáne qashyqtan oqýǵa qatysý múmkindiginen aiyrylǵan.
Departament ókilderi «Tutynýshylardyń quqyqtaryn qorǵaý týraly» zańnyń 7-babyna sáikes azamattarǵa sapaly qyzmet alý quqyǵy kepildendiriletinin eske saldy.
Eger qyzmet kórsetilmese nemese tiisti deńgeide usynylmasa, tutynýshy:
- tólemdi qaita esepteýdi,
- tólengen aqshany qaitarýdy talap etýge quqyly.
Mamandar azamattarǵa quqyqtyq kómek kórsetip, bailanys operatoryna sotqa deiingi tártippen talap aryz daiyndaýǵa járdem bergen.
Operator óz jaýabynda qyzmet sapasynyń tómendeýin atalǵan aýdanda qajetti telekommýnikatsiialyq infraqurylymnyń bolmaýymen bailanystyrǵan. Alaida abonentterdi aldyn ala eskertkeni jóninde naqty dálel usynylmaǵan.
Tekserý nátijesinde Departament sotqa 315 538 teńge kóleminde talap aryz joldaǵan.
Qujatta kórsetilgendei, naqty kórsetilmegen qyzmet úshin aqy alý Qazaqstan Respýblikasy Azamattyq kodeksiniń 953-babyna sáikes negizsiz baiý bolyp sanalady jáne qaitarylýǵa tiis.
Sot protsesi barysynda bailanys operatory talaptardyń negizdi ekenin moiyndaǵan. Taraptar mediatsiialyq kelisimge kelip, ol sotpen bekitildi.
Nátijesinde óńir turǵyndary sapasyz qyzmet kórsetilgen kezeń úshin ótemaqy aldy.
Qaitarylǵan qarajattyń jalpy somasy 234 657 teńge.
