جەتىسۋ وبلىسى بويىنشا ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتى سوت تارتىبىمەن ۇيالى بايلانىس پەن ينتەرنەت قىزمەتىنىڭ ساپاسىز كورسەتىلۋىنەن زارداپ شەككەن تۇرعىنداردىڭ اقشاسىن قايتارىپ بەردى، دەپ حابارلايدى Dalanews.kz.
تالدىقورعان قالالىق سوتىنىڭ 2026 جىلعى 13 قاڭتارداعى ۇيعارىمىمەن وبلىستىڭ ءبىر اۋدانىندا تۇراتىن ازاماتتاردىڭ ۇجىمدىق شاعىمى نەگىزىندە قوزعالعان رەزونانستى ءىس اياقتالدى.
سوت بارىسىندا تۇتىنۋشىلار ۇزاق ۋاقىت بويى ەلىمىزدەگى ءىرى بايلانىس وپەراتورلارىنىڭ ءبىرىنىڭ «وتباسىلىق ءتاريفى» بويىنشا ۇيالى بايلانىس پەن ءموبيلدى ينتەرنەت قىزمەتى ءۇشىن تۇراقتى تۇردە اقى تولەپ كەلگەنى انىقتالعان. سونىمەن قاتار، كەلىسىمشارت اياسىندا سمارتفوندار دا ساتىپ الىنعان.
اي سايىنعى ابونەنتتىك تولەم مولشەرى 11 670 تەڭگەدەن جوعارى بولعان.
الايدا 2025 جىلعى 10 قازان مەن 19 قاراشا ارالىعىندا، ياعني 41 كۇن بويى، بايلانىس پەن ينتەرنەت قىزمەتى ءتيىستى دەڭگەيدە كورسەتىلمەگەن.
- بايلانىس تۇراقسىز بولعان،
- ينتەرنەت جەلىسىنە قولجەتىمدىلىك ءىس جۇزىندە بولماعان.
سوعان قاراماستان وپەراتور ابونەنتتىك تولەمدى تولىق كولەمدە الۋدى جالعاستىرعان. بۇل جاعداي كەلىسىمشارت مىندەتتەمەلەرىنىڭ ورىندالماعانىن كورسەتەدى.
ساپاسىز بايلانىس تۇرعىندارعا ەلەۋلى قيىندىق تۋدىرعان:
- ەرەسەكتەر مەملەكەتتىك ورگاندار مەن جەدەل قىزمەتتەرگە حابارلاسا الماعان؛
- وقۋشىلار 41 كۇن بويى ءۇي تاپسىرمالارىن تولىق ورىنداۋ جانە قاشىقتان وقۋعا قاتىسۋ مۇمكىندىگىنەن ايىرىلعان.
دەپارتامەنت وكىلدەرى «تۇتىنۋشىلاردىڭ قۇقىقتارىن قورعاۋ تۋرالى» زاڭنىڭ 7-بابىنا سايكەس ازاماتتارعا ساپالى قىزمەت الۋ قۇقىعى كەپىلدەندىرىلەتىنىن ەسكە سالدى.
ەگەر قىزمەت كورسەتىلمەسە نەمەسە ءتيىستى دەڭگەيدە ۇسىنىلماسا، تۇتىنۋشى:
- تولەمدى قايتا ەسەپتەۋدى،
- تولەنگەن اقشانى قايتارۋدى تالاپ ەتۋگە قۇقىلى.
ماماندار ازاماتتارعا قۇقىقتىق كومەك كورسەتىپ، بايلانىس وپەراتورىنا سوتقا دەيىنگى تارتىپپەن تالاپ ارىز دايىنداۋعا جاردەم بەرگەن.
وپەراتور ءوز جاۋابىندا قىزمەت ساپاسىنىڭ تومەندەۋىن اتالعان اۋداندا قاجەتتى تەلەكوممۋنيكاسيالىق ينفراقۇرىلىمنىڭ بولماۋىمەن بايلانىستىرعان. الايدا ابونەنتتەردى الدىن الا ەسكەرتكەنى جونىندە ناقتى دالەل ۇسىنىلماعان.
تەكسەرۋ ناتيجەسىندە دەپارتامەنت سوتقا 315 538 تەڭگە كولەمىندە تالاپ ارىز جولداعان.
قۇجاتتا كورسەتىلگەندەي، ناقتى كورسەتىلمەگەن قىزمەت ءۇشىن اقى الۋ قازاقستان رەسپۋبليكاسى ازاماتتىق كودەكسىنىڭ 953-بابىنا سايكەس نەگىزسىز بايۋ بولىپ سانالادى جانە قايتارىلۋعا ءتيىس.
سوت پروسەسى بارىسىندا بايلانىس وپەراتورى تالاپتاردىڭ نەگىزدى ەكەنىن مويىنداعان. تاراپتار مەدياسيالىق كەلىسىمگە كەلىپ، ول سوتپەن بەكىتىلدى.
ناتيجەسىندە ءوڭىر تۇرعىندارى ساپاسىز قىزمەت كورسەتىلگەن كەزەڭ ءۇشىن وتەماقى الدى.
قايتارىلعان قاراجاتتىڭ جالپى سوماسى 234 657 تەڭگە.
