Qazaqstandaǵy ortasha jáne medianalyq jalaqy kólemi anyqtaldy, dep habarlaidy Dalanews.kz.
Ulttyq statistika biýrosynyń málimetine sáikes, 2024 jyldyń IV toqsanynda:
- Medianalyq jalaqy – 308 717 teńge,
- Ortasha jalaqy – 434 982 teńge.
III toqsanmen salystyrǵanda, medianalyq jalaqy 269 378 teńgeden 308 717 teńgege deiin ósti, al ortasha jalaqy 390 328 teńgeden 434 982 teńgege deiin kóterildi.
2023 jyldyń IV toqsanymen salystyrǵanda jalaqy 10,5%-ǵa ósti, al infliatsiiany eskergende, naqty ósim 1,8%.
Jalaqynyń artýy eńbekaqy qorynyń ulǵaiýymen, jyldyq bonýstar men merekelik syiaqylardyń berilýimen bailanysty.
Sala boiynsha eń joǵary ósim:
- Aqparat jáne bailanys – +32,8%
- Aýyl, orman jáne balyq sharýashylyǵy – +22,7%
- Jyljymaityn múlikpen operatsiialar – +20,3%
Aimaqtar boiynsha jalaqy ósimi
2024 jyldyń IV toqsanynda 2023 jyldyń IV toqsanymen salystyrǵanda eń joǵary jalaqy ósimi:
- Almaty jáne Shymkent qalalarynda – +13,6%
- Qaraǵandy oblysynda – +13,2%
- Soltústik Qazaqstan oblysynda – +12,9%
- Aqtóbe oblysynda – +12,6%
Medianalyq jáne ortasha jalaqynyń aiyrmashylyǵy
- Medianalyq jalaqy – barlyq qyzmetkerlerdi eki teń topqa bóledi: bir jartysy osy somadan az tabys tabady, al ekinshi jartysy kóp tabady. Bul kórsetkish shamadan tys joǵary nemese tómen jalaqylardyń áserin eskermeidi, sondyqtan naqty “ortasha” tabysty kórsetedi.
- Ortasha jalaqy – barlyq qyzmetkerlerdiń jalaqysy qosymsha tólemder, ústemaqylar, syiaqylar, salyqtar men zeinetaqy aýdarymdaryn eskere otyryp esepteledi. Ol jalaqy qorynyń jalpy somasyn jumysshylar sanyna bólý arqyly anyqtalady.
