Qazaqstan azamattarynyń pikirinshe, dini kózqarasqa qatysty kemsitýshiliktiń eń jii kórinisi – internet keńistigindegi qorlaityn jazbalar men beineler, dep habarlaidy Dalanews.kz.
Bul derekter 2024 jyldyń sońǵy toqsanynda Qazaqstan Respýblikasynyń Din isteri komiteti júrgizgen áleýmettik zertteý qorytyndysynda jariialandy. Saýalnamaǵa elimizdiń ár óńirinen 18 ben 65 jas aralyǵyndaǵy 1500 azamat qatysqan.
Nátijesinde, halyqtyń 24,1 paiyzy ózderin barlyq dini talaptar men rásimderdi tolyq oryndaityn dindarlar retinde sipattasa, 62,7 paiyzy dini senimde bolǵanymen, tek dini meiramdar men keibir ǵuryptardy ǵana oryndaitynyn aitqan. Taǵy 9,2% respondent ózderin dinsizbin dep tanysa da, keibir dini ádet-ǵuryptardy saqtaitynyn jetkizgen. Al 1,3% dinge senbeitinin jáne dini rásimderden alys ekenin aitqan. 0,9% ózderin dinge múlde qarsy, dini adamdardy túsinbeitin ateist retinde kórsetti. Taǵy 0,5% — agnostikpin dep jaýap bergen.
Saýalnamaǵa qatysqandardyń 65,1%-y hanafi mazhabyndaǵy islam dinin ustanatynyn aitqan. Al islamnyń ózge baǵyttaryn 11,6% ustanady eken. 14,8% — pravoslav, 2,1% — katolik, 1,8% — protestant. Sonymen qatar indýizm, býddizm jáne putqa tabynýshylyqty ustanatyndar úlesi — árqaisysy 0,1%, táńirshildikti ustanatyndar — 1,9%. Al 0,8% eshbir naqty dinge jatpaitynyn, biraq ózin senýshi dep sanaitynyn kórsetken.
Kúndelikti bes ýaqyt namaz oqityndardyń úlesi bir toqsanda 1,6 paiyzdyq pýnktke artyp, 19,3%-ǵa jetken. Al 27,9% eshqashan namaz oqymaǵanyn moiyndaǵan — bul kórsetkish aldyńǵy toqsanmen birdei.
Meshit pen shirkeý siiaqty qulshylyq oryndaryna kún saiyn baratyndar – 6,2%, aptasyna bir ret — 14,5%, aiyna bir ret — 17,5%. Al jylyna birneshe ret qana barýshylar — 33,8%, birneshe jylda bir ret qana baratyndar — 16,1%, al 10,4% eshqashan barmaǵan.
Saýalnama qatysýshylarynyń 41,3%-y sońǵy úsh aida dinine bailanysty qysym kórgenin aitqan. Qalǵan 57,7% mundai jaǵdaiǵa kezikpegenderin aitsa, 1% jaýap berýge qinalǵan.
Kemsitý formalaryna kelsek, 19,3% óz dinin qorlaityn beinelerdiń internette jariialanýyna narazy. Taǵy 11,5% áleýmettik jelilerdegi dinge til tigizetin pikirlerge tap bolǵan. Sonymen qatar 10,8% — ózderi nemese qyzdary hidjab kigeni úshin mektepke ne JOO-ǵa kire almaǵan. Al 7,8% — qulshylyq úiine barýǵa dini qyzmetkerdiń ózi ruqsat bermegenin aitqan.
