قازاقستان ازاماتتارىنىڭ پىكىرىنشە، ءدىني كوزقاراسقا قاتىستى كەمسىتۋشىلىكتىڭ ەڭ ءجيى كورىنىسى – ينتەرنەت كەڭىستىگىندەگى قورلايتىن جازبالار مەن بەينەلەر، دەپ حابارلايدى Dalanews.kz.
بۇل دەرەكتەر 2024 جىلدىڭ سوڭعى توقسانىندا قازاقستان رەسپۋبليكاسىنىڭ ءدىن ىستەرى كوميتەتى جۇرگىزگەن الەۋمەتتىك زەرتتەۋ قورىتىندىسىندا جاريالاندى. ساۋالناماعا ەلىمىزدىڭ ءار وڭىرىنەن 18 بەن 65 جاس ارالىعىنداعى 1500 ازامات قاتىسقان.
ناتيجەسىندە، حالىقتىڭ 24،1 پايىزى وزدەرىن بارلىق ءدىني تالاپتار مەن راسىمدەردى تولىق ورىندايتىن ءدىندارلار رەتىندە سيپاتتاسا، 62،7 پايىزى ءدىني سەنىمدە بولعانىمەن، تەك ءدىني مەيرامدار مەن كەيبىر عۇرىپتاردى عانا ورىندايتىنىن ايتقان. تاعى 9،2% رەسپوندەنت وزدەرىن ءدىنسىزبىن دەپ تانىسا دا، كەيبىر ءدىني ادەت-عۇرىپتاردى ساقتايتىنىن جەتكىزگەن. ال 1،3% دىنگە سەنبەيتىنىن جانە ءدىني راسىمدەردەن الىس ەكەنىن ايتقان. 0،9% وزدەرىن دىنگە مۇلدە قارسى، ءدىني ادامداردى تۇسىنبەيتىن اتەيست رەتىندە كورسەتتى. تاعى 0،5% — اگنوستيكپىن دەپ جاۋاپ بەرگەن.
ساۋالناماعا قاتىسقانداردىڭ 65،1%-ى حانافي مازحابىنداعى يسلام ءدىنىن ۇستاناتىنىن ايتقان. ال يسلامنىڭ وزگە باعىتتارىن 11،6% ۇستانادى ەكەن. 14،8% — پراۆوسلاۆ، 2،1% — كاتوليك، 1،8% — پروتەستانت. سونىمەن قاتار يندۋيزم، بۋدديزم جانە پۇتقا تابىنۋشىلىقتى ۇستاناتىندار ۇلەسى — ءارقايسىسى 0،1%، تاڭىرشىلدىكتى ۇستاناتىندار — 1،9%. ال 0،8% ەشبىر ناقتى دىنگە جاتپايتىنىن، ءبىراق ءوزىن سەنۋشى دەپ سانايتىنىن كورسەتكەن.
كۇندەلىكتى بەس ۋاقىت ناماز وقيتىنداردىڭ ۇلەسى ءبىر توقساندا 1،6 پايىزدىق پۋنكتكە ارتىپ، 19،3%-عا جەتكەن. ال 27،9% ەشقاشان ناماز وقىماعانىن مويىنداعان — بۇل كورسەتكىش الدىڭعى توقسانمەن بىردەي.
مەشىت پەن شىركەۋ سياقتى قۇلشىلىق ورىندارىنا كۇن سايىن باراتىندار – 6،2%، اپتاسىنا ءبىر رەت — 14،5%، ايىنا ءبىر رەت — 17،5%. ال جىلىنا بىرنەشە رەت قانا بارۋشىلار — 33،8%، بىرنەشە جىلدا ءبىر رەت قانا باراتىندار — 16،1%، ال 10،4% ەشقاشان بارماعان.
ساۋالناما قاتىسۋشىلارىنىڭ 41،3%-ى سوڭعى ءۇش ايدا دىنىنە بايلانىستى قىسىم كورگەنىن ايتقان. قالعان 57،7% مۇنداي جاعدايعا كەزىكپەگەندەرىن ايتسا، 1% جاۋاپ بەرۋگە قينالعان.
كەمسىتۋ فورمالارىنا كەلسەك، 19،3% ءوز ءدىنىن قورلايتىن بەينەلەردىڭ ينتەرنەتتە جاريالانۋىنا نارازى. تاعى 11،5% الەۋمەتتىك جەلىلەردەگى دىنگە ءتىل تيگىزەتىن پىكىرلەرگە تاپ بولعان. سونىمەن قاتار 10،8% — وزدەرى نەمەسە قىزدارى حيدجاب كيگەنى ءۇشىن مەكتەپكە نە جوو-عا كىرە الماعان. ال 7،8% — قۇلشىلىق ۇيىنە بارۋعا ءدىني قىزمەتكەردىڭ ءوزى رۇقسات بەرمەگەنىن ايتقان.
