Qazaqstandyq ánshi Ámre halyqaralyq “Intervıdenıe – 2025” baıqaýynda “Dala tańy” kompozısıasyn oryndaıdy, dep habarlaıdy Dalanews.kz
Bul án usynylǵan 10 nusqanyń ishinen tańdalǵan. Mýzykasyn oryndaýshynyń ózi jazsa, sózin aqyn Saıat Rahymjanov qalamǵa alǵan.
Baıqaýdaǵy Ámreniń nómiri erekshe bolmaq. Óner ıesimen birge sahnaǵa segiz jasar Jasmın Qaıratqyzy shyǵady. Ol – qazaqstandyq delegasıanyń eń jas múshesi. Arnaıy kastıngke qatysqan 100 úmitkerdiń ishinen Jasmın úzdik tanyldy. Qoıylymnyń tolyq mazmuny ázirge qupıa saqtalýda, alaıda ózge elderdiń qatysýshylary nómirge joǵary baǵa bergen.
Bul án tek osynda ǵana emes, qatysýshylardyń barlyǵynyń júregin jaýlap aldy. Olar áýenin birge aıtyp, súısine qabyldap jatyr. Bizdiń basty maqsatymyz – bul týyndy Qazaqstanda da hıtke aınalýy. Ol Otanǵa degen mahabbatty pash etetin patrıottyq ánderdiń kóshbasshylarynyń biri bolsyn deımiz, - dedi Qazaqstan delegasıasynyń bas prodúseri Altynbek Rahmetov.
Baıqaýǵa 23 eldiń oryndaýshysy qatysyp jatyr. Fınaldy 20 qyrkúıek kúni saǵat 22:30-da “Eýrazıa birinshi arnasy” tikeleı efırde kórsetedi.
