Qazaqstandyqtyń 12 million dollar bailyǵy el paidasyna alynady. Bul týraly Bas prokýratýranyń aktivterdi qaitarý komitetiniń basshysy Nurdáýlet Súiindikov «Vozvratý podlejit» derekti filminde aitty, - dep habarlaidy Dalanews.kz.
«Eger memleket tarapynan kúdik týsa, adam qandai da bir múlkin zańdy alǵanyn dáleldei alýy kerek. Eger dáleldei almasa, sottyń sheshimimen múlikke «túsiniksiz bailyq» statýsy berilip, memleketke qaitarylady», - deidi Súiindikov.
12 million dollar bailyqqa qatysty sot sheshimi de shyǵyp úlgergen. Onyń 11 million dollary aqshalai bailyq bolsa, 1 million dollary brendtik áshekei buiymdar, saǵat jáne kólik.
Buǵan deiin Bas prokýratýra qaitarylǵan aktivter týraly tyń derek jariialaǵan bolatyn.
Bas prokýratýra eldegi 1 myńnan asa jáne sheteldegi 150-den asa múlik týraly málimetterdi taldap jatyr. Taldaýda taǵy 600 milliard teńgeniń baǵaly qaǵazdary qamtylǵan. Elimizde 200-den asa jáne shetelde 140 bank shoty anyqtaldy. 2 trillion teńgege jýyq kúdikti tranzaktsiialar tekserilip jatyr.
Premer-ministrdiń basshylyǵymen komissiia 325 milliard teńgeden asa somaǵa aktivterdi memleketke qaitarý týraly kelisimder men talaptardy maquldady, onyń ishinde 272 milliard teńge teńgerimindegi aqshalai qarajat bar. Olar mańyzdy áleýmettik jáne ekonomikalyq jobalardy júzege asyrýǵa baǵyttalatyny aityldy.
Sondai-aq, elimizdegi jáne sheteldegi quny 50 milliard teńgeden asatyn aktivter memleketke berildi. Olardyń ishinde birqatar strategiialyq ken oryndary, monopolistik kompaniialar, ondaǵan myń gektar jer, sondai-aq, óndiris obektileri, qonaqúiler, biznes ortalyqtary, villalar, páterler, sándi kólikter, zergerlik buiymdar jáne taǵy basqalary bar.
Tizilimniń keibir sýbektileri óz erkimen jalpy quny 30 milliard teńge bolatyn joǵary tehnologiialyq investjobalardy júzege asyrýǵa mindetteme alǵan. Olardyń ishinde qubyrlar, qaptamalar, himiialyq, azyq-túlik jáne t.b. ónimderdi shyǵaratyn óndiris nysandary bar. Osylaisha, keminde 300 jańa jumys ornyn qurý josparlanyp otyr, jyldyq salyq 1 milliard teńgeden asýǵa tiis.
