قازاقستاندىق 12 ميلليون دوللار بايلىقتى قايدان العانىن دالەلدەي المادى

كوركەم الدابەرگەنوۆا 12 ماۋ. 2024 11:46 6146

قازاقستاندىقتىڭ 12 ميلليون دوللار بايلىعى ەل پايداسىنا الىنادى. بۇل تۋرالى باس پروكۋراتۋرانىڭ اكتيۆتەردى قايتارۋ كوميتەتىنىڭ باسشىسى نۇرداۋلەت سۇيىندىكوۆ «ۆوزۆراتۋ پودلەجيت» دەرەكتى فيلمىندە ايتتى، - دەپ حابارلايدى Dalanews.kz.

«ەگەر مەملەكەت تاراپىنان كۇدىك تۋسا، ادام قانداي دا ءبىر مۇلكىن زاڭدى العانىن دالەلدەي الۋى كەرەك. ەگەر دالەلدەي الماسا، سوتتىڭ شەشىمىمەن مۇلىككە «تۇسىنىكسىز بايلىق» ستاتۋسى بەرىلىپ، مەملەكەتكە قايتارىلادى»، - دەيدى سۇيىندىكوۆ.  

12 ميلليون دوللار بايلىققا قاتىستى سوت شەشىمى دە شىعىپ ۇلگەرگەن. ونىڭ 11 ميلليون دوللارى اقشالاي بايلىق بولسا، 1 ميلليون دوللارى برەندتىك اشەكەي بۇيىمدار، ساعات جانە كولىك.

بۇعان دەيىن باس پروكۋراتۋرا قايتارىلعان اكتيۆتەر تۋرالى تىڭ دەرەك جاريالاعان بولاتىن.

باس پروكۋراتۋرا ەلدەگى 1 مىڭنان اسا جانە شەتەلدەگى 150-دەن اسا مۇلىك تۋرالى مالىمەتتەردى تالداپ جاتىر. تالداۋدا تاعى 600 ميلليارد تەڭگەنىڭ باعالى قاعازدارى قامتىلعان. ەلىمىزدە 200-دەن اسا جانە شەتەلدە 140 بانك شوتى انىقتالدى. 2 تريلليون تەڭگەگە جۋىق كۇدىكتى ترانزاكسيالار تەكسەرىلىپ جاتىر.

پرەمەر-مينيستردىڭ باسشىلىعىمەن كوميسسيا 325 ميلليارد تەڭگەدەن اسا سوماعا اكتيۆتەردى مەملەكەتكە قايتارۋ تۋرالى كەلىسىمدەر مەن تالاپتاردى ماقۇلدادى، ونىڭ ىشىندە 272 ميلليارد تەڭگە تەڭگەرىمىندەگى اقشالاي قاراجات بار. ولار ماڭىزدى الەۋمەتتىك جانە ەكونوميكالىق جوبالاردى جۇزەگە اسىرۋعا باعىتتالاتىنى ايتىلدى.

سونداي-اق، ەلىمىزدەگى جانە شەتەلدەگى قۇنى 50 ميلليارد تەڭگەدەن اساتىن اكتيۆتەر مەملەكەتكە بەرىلدى. ولاردىڭ ىشىندە ءبىرقاتار ستراتەگيالىق كەن ورىندارى، مونوپوليستىك كومپانيالار، ونداعان مىڭ گەكتار جەر، سونداي-اق، ءوندىرىس وبەكتىلەرى، قوناقۇيلەر، بيزنەس ورتالىقتارى، ۆيللالار، پاتەرلەر، ءساندى كولىكتەر، زەرگەرلىك بۇيىمدار جانە تاعى باسقالارى بار.

ءتىزىلىمنىڭ كەيبىر سۋبەكتىلەرى ءوز ەركىمەن جالپى قۇنى 30 ميلليارد تەڭگە بولاتىن جوعارى تەحنولوگيالىق ينۆەستجوبالاردى جۇزەگە اسىرۋعا مىندەتتەمە العان. ولاردىڭ ىشىندە قۇبىرلار، قاپتامالار، حيميالىق، ازىق-تۇلىك جانە ت.ب. ونىمدەردى شىعاراتىن ءوندىرىس نىساندارى بار. وسىلايشا، كەمىندە 300 جاڭا جۇمىس ورنىن قۇرۋ جوسپارلانىپ وتىر، جىلدىق سالىق 1 ميلليارد تەڭگەدەن اسۋعا ءتيىس.

 


ۇسىنىلعان
سوڭعى جاڭالىقتار