Qarjy salasynyń sarapshysy Arman Beisembaev qazir birjadaǵy baǵa 521 teńgege baryp alǵanyn aitady. Ol jaqyn arada munai baǵasy turaqtamasa, onda erteń-búrsúngi 1 AQSh dollary 530 teńgege baryp alýy múmkin ekenin, al arǵy ailarda 545-550 teńge aralyǵyn ustaý yqtimaldylyǵyn boljaidy. Odan bólek, 560-565 teńge dálizindegi kontrfaza degen taǵy bar, dep habarlaidy Dalanews.kz.
Arman Beisembaev munai baǵasy qulasa, teńge de qunsyzdana beretinin naqtylaidy. Eger munaidyń bir barreli 50 dollarǵa deiin tússe, onyń boljamynsha, 1 AQSh dollary 580 teńge bolyp qalady, onda da bul jyl sońyna qarai oryn alýy yqtimal jaǵdai.
"Bul arada myna nárseni basa aita ketkim keledi. Munai naryǵyndaǵy baǵa turlaýsyz. Ol bir baǵany únemi saqtap turmaidy. Ol birde ósse, birde tómendep otyrady. Qazirgi jaǵdaida, árine AQSh prezidenti Tramptyń tarif saiasaty naryqtarǵa teris yqpal etýde. Sonyń ishinde álemdik munai naryǵyna da. "Jyǵylǵanǵa judyryq" demekshi, OPEK+ uiymy da buǵan deiingi saiasatynan bas tartyp, munai óndirisi kólemin arttyratynyn jariialady. Ainalyp kelgende, osy eki faktor álemdik naryqtarda qazir daýyl týǵyzýda", - deidi ol.
Sarapshy naq osy eki faktor munai naryǵynda profitsit týdyratynyn boljaidy.
"Munaiǵa qatysty arab elderiniń sońǵy sheshimi jariialanǵan kezde Bloomberg basylymynda "OPEK osylaisha Qazaqstandy jazalaýda" degen maqala jariialandy. Iaǵni, baǵa joǵary ári qolaily kezde óndiristi qysqartpasańyzdar, onda túsireiik degeni ǵoi. Belgilengen kvotadan asyra munai óndirip jatqan basqa da elder bar. Onsyz da bizde munai óndirý qymbat, keide ony ózindik qunynan da tómen satyp jatamyz. Baǵa tómendese, shikizatty igerýshi elder usynysty eriksiz azaitady, kim taýaryn arzanǵa satqysy keledi deisiz. Sóitip baǵa birtindep rettelýi kerek", - deidi maman.
Onyń aitýynsha, qazirgi baǵa kúzdegi, ne bolmasa 2026 jyldyń biýdjetine qatysty.
"Munai boiynsha kelisimsharttar 3-6 aiǵa jasalady. Odan bólek bir jylǵa arnalǵan jasyryn kelisimsharttar bolady. Onda baǵa aldyn ala belgilenedi. Sondyqtan munai naryǵyndaǵy búgingi baǵa kúzdegi, ne bolmasa 2026 jyldyń basyndaǵy biýdjetke qatysty bolmaq", - deidi ol.
Buǵan deiin saitymyzda "Teńge qunsyzdanyp jatyr". Sarapshylar AQSh dollaryna qatysty óz boljamdarymen bólisti" degen material jariialanǵan bolatyn.
