قارجى سالاسىنىڭ ساراپشىسى ارمان بەيسەمبايەۆ ءقازىر بيرجاداعى باعا 521 تەڭگەگە بارىپ العانىن ايتادى. ول جاقىن ارادا مۇناي باعاسى تۇراقتاماسا، وندا ەرتەڭ-بۇرسۇنگى 1 اقش دوللارى 530 تەڭگەگە بارىپ الۋى مۇمكىن ەكەنىن، ال ارعى ايلاردا 545-550 تەڭگە ارالىعىن ۇستاۋ ىقتيمالدىلىعىن بولجايدى. ودان بولەك، 560-565 تەڭگە دالىزىندەگى كونترفازا دەگەن تاعى بار، دەپ حابارلايدى Dalanews.kz.
ارمان بەيسەمبايەۆ مۇناي باعاسى قۇلاسا، تەڭگە دە قۇنسىزدانا بەرەتىنىن ناقتىلايدى. ەگەر مۇنايدىڭ ءبىر باررەلى 50 دوللارعا دەيىن تۇسسە، ونىڭ بولجامىنشا، 1 اقش دوللارى 580 تەڭگە بولىپ قالادى، وندا دا بۇل جىل سوڭىنا قاراي ورىن الۋى ىقتيمال جاعداي.
"بۇل ارادا مىنا نارسەنى باسا ايتا كەتكىم كەلەدى. مۇناي نارىعىنداعى باعا تۇرلاۋسىز. ول ءبىر باعانى ۇنەمى ساقتاپ تۇرمايدى. ول بىردە وسسە، بىردە تومەندەپ وتىرادى. قازىرگى جاعدايدا، ارينە اقش پرەزيدەنتى ترامپتىڭ تاريف ساياساتى نارىقتارعا تەرىس ىقپال ەتۋدە. سونىڭ ىشىندە الەمدىك مۇناي نارىعىنا دا. "جىعىلعانعا جۇدىرىق" دەمەكشى، وپەك+ ۇيىمى دا بۇعان دەيىنگى ساياساتىنان باس تارتىپ، مۇناي ءوندىرىسى كولەمىن ارتتىراتىنىن جاريالادى. اينالىپ كەلگەندە، وسى ەكى فاكتور الەمدىك نارىقتاردا ءقازىر داۋىل تۋعىزۋدا"، - دەيدى ول.
ساراپشى ناق وسى ەكى فاكتور مۇناي نارىعىندا پروفيسيت تۋدىراتىنىن بولجايدى.
"مۇنايعا قاتىستى اراب ەلدەرىنىڭ سوڭعى شەشىمى جاريالانعان كەزدە Bloomberg باسىلىمىندا "وپەك وسىلايشا قازاقستاندى جازالاۋدا" دەگەن ماقالا جاريالاندى. ياعني، باعا جوعارى ءارى قولايلى كەزدە ءوندىرىستى قىسقارتپاساڭىزدار، وندا تۇسىرەيىك دەگەنى عوي. بەلگىلەنگەن كۆوتادان اسىرا مۇناي ءوندىرىپ جاتقان باسقا دا ەلدەر بار. ونسىز دا بىزدە مۇناي ءوندىرۋ قىمبات، كەيدە ونى وزىندىك قۇنىنان دا تومەن ساتىپ جاتامىز. باعا تومەندەسە، شيكىزاتتى يگەرۋشى ەلدەر ۇسىنىستى ەرىكسىز ازايتادى، كىم تاۋارىن ارزانعا ساتقىسى كەلەدى دەيسىز. ءسويتىپ باعا بىرتىندەپ رەتتەلۋى كەرەك"، - دەيدى مامان.
ونىڭ ايتۋىنشا، قازىرگى باعا كۇزدەگى، نە بولماسا 2026 جىلدىڭ بيۋدجەتىنە قاتىستى.
"مۇناي بويىنشا كەلىسىمشارتتار 3-6 ايعا جاسالادى. ودان بولەك ءبىر جىلعا ارنالعان جاسىرىن كەلىسىمشارتتار بولادى. وندا باعا الدىن الا بەلگىلەنەدى. سوندىقتان مۇناي نارىعىنداعى بۇگىنگى باعا كۇزدەگى، نە بولماسا 2026 جىلدىڭ باسىنداعى بيۋدجەتكە قاتىستى بولماق"، - دەيدى ول.
بۇعان دەيىن سايتىمىزدا "تەڭگە قۇنسىزدانىپ جاتىر". ساراپشىلار اقش دوللارىنا قاتىستى ءوز بولجامدارىمەن ءبولىستى" دەگەن ماتەريال جاريالانعان بولاتىن.
