Memlekettik keńesshi Erlan Qarin jýrnalist Nartai Aralbaiulyna bergen suhbatynda Qazaqstannyń kemshilikterin sheteldik seminarlarda asyra siltep kórsetetin sarapshylar men belsendilerdi synǵa aldy, dep habarlaidy Dalanews.kz.
"Jaqynda áleýmettik jeliden elge belgili bir belsendiniń shetelde sóilegen sózin kórip qaldym. Shynymdy aitsam, qatty ashýlandym. Qazaqstanda sońǵy jyldary saiasi jaǵdai keri ketip jatyr, demokratiia joq, azamattardyń pikir aitýǵa quqyǵy joq dep aitypty. Osyny zalda otyrǵan sheteldikterge jetkizip otyr. Elde, ras, sheshimin tappaǵan másele barshylyq, ony eshkim joqqa shyǵarmaidy. Biraq bárin jappai joqqa shyǵaryp, eldiń damýyn artqa ketti dep baǵalaý – ádiletsizdik", – dedi Qarin.
Ol Qazaqstannyń sońǵy jyldary saiasi reformalardy qolǵa alyp, demokratiiaǵa qarai qadam basqanyn atap ótti.
"Eger bizde sóz bostandyǵy bolmasa, jurt saiasi taqyrypty Youtube-te erkin talqylap, eshkimnen qoryqpai syn aitpas edi. Qazir úsh adam otyryp alyp, saiasi podkast jasaidy. Kez kelgen máseleni talqylaidy, keide faktimen, keide ósek-aiańmen. Eger jaǵdai aitqandaryndai kúrdeli bolsa, osylai ashyq talqylaýlar bolar ma edi?", – deidi Erlan Qarin.
Sonymen qatar memlekettik keńesshi sheteldik qorlarmen jumys isteitin keibir sarapshylardyń syrtta Qazaqstan týraly jaǵymsyz pikir aitýy belgili bir biznes-jobaǵa ainalyp ketkendei áser qaldyratynyn jasyrmady.
"Jaqynda qoǵamdyq alańda júrgen bir áriptesim kelip, halyqaralyq qorlar Qazaqstan boiynsha jobalardy qysqartýǵa sheshim qabyldaǵanyn aitty. Sebebi, eldegi jaǵdai jaqsarypty, burynǵydai qarjylandyrýǵa qajettilik joq kórinedi. «Siz ne aitqyńyz kelgenin endi túsindim» deidi álgi áriptesim. Shyn máninde keibir belsendiler eldegi jaǵdaidyń jaqsarǵanyn moiyndaǵysy kelmeidi, óitkeni jaǵdai jaqsarsa, qarjy kelmeidi. Olar úshin Qazaqstandy syrtta synaý – kádimgidei bizneske ainalyp ketken. Sol úshin olar eldi jaman etip kórsetýge múddeli", – deidi Erlan Qarin.
Onyń aitýynsha, osyndai áreketke baryp júrgender kóbinese ózderin táýelsiz sarapshy sanaidy, alaida shyn máninde olardy sheteldik qorlar qarjylandyryp otyr.
"Óz elińde turasyń, osy elden aqsha tabasyń, biznes-klaspen shetelge shyǵasyń, biraq Qazaqstandy jamandaýdan tanbaisyń. Buny qalai ádiletti dei alamyz? Táýelsizdik degen sol ma? Shyndyqty aitsaq, ádil bolaiyq. Syn aitsaq ta, bárine birdei talap qoiaiyq. Sonda ǵana qoǵam durys jolmen júredi", – dep túiindedi Erlan Qarin.
