Qaraǵandy oblysynda Qazaqstandaǵy eń tereń shahta oqpanynyń qurylysy bastaldy, dep habarlaidy dalanews.kz.
«Qazaqmys korporatsiiasy» JShS Qaraǵandy oblysyndaǵy «Nurqazǵan» ken ornynyń Shyǵys ýchaskesinde «Aýa jetkizýshi-klet-2» shahta oqpanynyń qurylysyn bastady. Jobaǵa 32,5 mlrd teńgeden astam investitsiia salynady.
Kompaniia málimetinshe, jańa shahta oqpanynyń jobalyq tereńdigi 1283,9 metrdi quraidy. Bul ony Qazaqstandaǵy eń tereń shahta oqpanyna ainaldyrady.
Joba ken ornynyń Shyǵys ýchaskesin igerýge, jerasty qazbalaryn taza aýamen qamtamasyz etýge, jumysshylar men tehnikany qaýipsiz tasymaldaýǵa jáne jańa ken qorlaryn ashýǵa múmkindik beredi. Qurylys barysynda 65 myń tekshe metrden astam taý jynysyn qazyp, qoldanystaǵy deńgeijiektermen toǵyz túiisý qurylysyn salý josparlanǵan.
«Qazaqmys» baqylaý keńesiniń tóraǵasy Nurmuhambet Ábdibekovtiń aitýynsha, bul joba óndiristi damytýǵa, ónerkásiptik qaýipsizdikti kúsheitýge jáne kompaniianyń shikizattyq bazasyn nyǵaitýǵa baǵyttalǵan uzaq merzimdi investitsiia.
Shahta oqpanyn úńgileý jumystaryn 2031 jyly aiaqtaý josparlanyp otyr. Odan keiin nysan zamanaýi tehnologiialyq jabdyqtarmen jabdyqtalady. Atap aitqanda, kletti kótergish, bas jeldetkish qondyrǵysy jáne jerasty qazbalaryna aýa berýge arnalǵan modýldik jylý energetikalyq qazandyq ornatylady.
Keiin joba aiasynda «Jeldetkish-2» shahta oqpanynyń qurylysy da júzege asady. Ol paidalanylǵan aýany syrtqa shyǵarýǵa, rezervtik shyǵý jolyn qamtamasyz etýge jáne ken qorlaryn odan ári igerýge múmkindik beredi.
Mys, altyn jáne kúmis qory rastalǵan «Nurqazǵan» ken ornynyń qory taý-ken baiytý kesheniniń 40 jyldan astam turaqty jumysyn qamtamasyz ete alatyny aityldy. Kompaniia bul jobany óndiristik qýatty arttyrýǵa jáne kenishtiń uzaq merzimdi jumysyn qamtamasyz etýge baǵyttalǵan strategiialyq investitsiia retinde baǵalap otyr.
