Sıfrlandyrýdyń Qazaqstan qoǵamyna etene sińip ketkeni qazir eshkimge jańalyq emes. Bir kezderi anyqtama alý úshin tań atpaı HQKO aldynda kezekke turǵan halyq búginde sol qyzmetti úıinde otyryp-aq telefon arqyly ala alady. Memlekettik qyzmetterdiń 92 paıyzdan astamynyń onlaın formatqa kóshýi kúndelikti turmystyń jeńildegeniniń aıqyn dáleli.
Buryn adamdar úshin ýaqyt – eń úlken shyǵyn edi. Saǵattap kezek kútý, qujat jınaý, qolhat toltyrý. Al qazir eGov.kz ulttyq portaly men eGov Mobile qosymshasy arqyly 1200-den astam qyzmetke birneshe mınýt ishinde qol jetkizýge bolady.
2025 jyldyń alǵashqy jartyjyldyǵynda 23 mıllıonnan astam qyzmet kórsetilip, onyń 45 paıyzy smartfon arqyly oryndalǵan. El azamattarynyń basym bóligi úshin telefon ámbebap quralǵa aınaldy. Kaspi.kz arqyly komýnaldyq tólem jasap, dúkende esep aıyrysyp, endi memlekettik qyzmetti de resmı qosymshadan alýǵa múmkindik bar. Osylaısha memleket halyqtyń turmys saltyna beıimdelip, sıfrlyq sheshimderdi eń qarapaıym jolmen jetkizýge tyrysýda.
Sıfrlandyrý tek qyzmetti jeńildetýmen shektelmeıdi, ol basqarý júıesiniń ózine de ózgeris ákeldi. Buryn memlekettik apparat búrokratıalyq prosedýralarǵa súıense, qazir derekterdi óńdeý, ıntegrasıalaý, taldaý arqyly jedel sheshim qabyldaý mádenıeti qalyptasyp keledi. Bıznes ashý, salyq tóleý, sotqa shaǵym túsirý sıaqty kúrdeli prosesterdiń ózi elektrondy formatta júzege asýda. Bul bir jaǵynan ashyqtyqty arttyrsa, ekinshi jaǵynan sybaılas jemqorlyq táýekelderin azaıtady.
eGov Mobile qosymshasynyń bıometrıkalyq sáıkestendirý, push-habarlamalar jáne superapp-tarmen ıntegrasıalanýy – sıfrlyq ekojúıeniń jańa dáýirge qadam basqanyn bildiredi. Buryn memlekettik pen jekemenshik sektordyń arasy qatań ajyratylatyn bolsa, qazir olardyń shekarasy joıylǵan.
2025 jyldyń ortasynda eGov portalynyń tirkelgen qoldanýshylary 14,7 mıllıonnan asty. Bul – el halqynyń úshten eki bóliginen kóp. Sońǵy bir jylda 215 myń jańa qoldanýshy qosylǵany sıfrlyq qabyldaýdyń áli de ósip kele jatqanyn kórsetedi. Eger bastapqyda eGov kóbine jastardyń enshisinde bolsa, búginde zeınetkerler de onlaın qyzmetti erkin paıdalana bastady. Bul – sıfrlyq teńsizdiktiń azaıyp kele jatqanyn bildiredi.
Qazaqstandaǵy sıfrlyq qyzmetterdiń damýy saıası mádenıettiń de aınasyna aınalyp otyr. Memleket halyqqa yńǵaıly bolýǵa umtylyp, azamattar óz kezeginde jańa tehnologıalarǵa beıimdelýde. Osy ózara senim men beıimdelý úrdisi jalǵasa berse, jaqyn bolashaqta memlekettik qyzmetterdiń tolyqtaı elektrondy formatqa kóshýi tańsyq bolmaıdy.
