2019 jyly prezıdenttik ókilettikterdiń kóshýinen keıingi kezeń Qazaqstan úshin Elbasy men el prezıdenti ınstıtýttarynyń birge áreket etýi prezıdenttik basqarý nysanynyń tıimdiligin, oryndylyǵyn jáne ornyqtylyǵyn kórsetip otyr.
Osy yntymaqtastyq COVID-19 pandemıasynyń qıyn kezeńinde jáne onyń saldarynan ekonomıkalyq júıeniń barlyq sektorynda jáne azamattyq qoǵamnyń áleýmettik blogynda týyndaǵan qıyndyqtar, halyqaralyq kún tártibi kóleminiń artýy jaǵdaıynda erekshe ózekti boldy, dedi Mámı 21 maýsymda parlament palatalarynyń birlesken otyrysynda.
Qazaqstannyń eks-prezıdenti Nursultan Nazarbaevtyń "Elbasy" statýsy bar. Bul statýstyń arqasynda onyń ózine jáne otbasyna qylmystyq is qozǵalmaıdy.
Mámı prezıdent Toqaev "Elbasy" Nazarbaev aıqyndap bergen baǵytyn oıdaǵydaı jalǵastyryp jatyr degendi meńzedi.
Memleket basshysynyń is-qımyldarymen Elbasynyń memlekettilikti odan ári údemeli damytý jónindegi strategıalary men dástúrleri jalǵasyp jatqany aqıqat. Olar strategıalyq josparlaýdyń negizgi qujattarynda qamtylǵan, dedi ol.
Mámı joldaýda bıyl qańtarda epıdemıologıalyq jaǵdaıdyń kúrdeli ekenine qaramastan májilis jáne máslıhat depýtattarynyń saılaýy "qoldanystaǵy jańartylǵan zańnamaǵa sáıkes ótkenin" atap ótti. (Halyqaralyq baqylaýshylar saılaýda zańsyzdyqtar kóp boldy dep baǵalaǵan - red.).
Aýyl sharýashylyǵy jerlerin jeke menshikke berýge jáne sheteldikterge berýge tyıym salatyn zań, "Advokat qyzmeti" týraly zańdardyń qabyldanǵanyn aıtty.
Quramynda jeti múshesi bar Konstıtýsıalyq keńes elde prezıdent, parlament saılaýy, referendýmnyń zańdy ótýin qadaǵalaıdy. Qabyldanǵan zańdardyń, ratıfıkasıalanǵan halyqaralyq kelisimderdiń Konstıtýsıaǵa sáıkestigin tekseredi. Zańdarǵa túsinikteme beredi. Keńestiń ózge de mindetteri bar.
2019 jyly eldi otyz jylǵa jýyq basqarǵan Nursultan Nazarbaevtyń otstavkaǵa ketkennen keıin de saıası keńistikte yqpalyn saqtap qalýy elde "qos bılik ornady" degen tujyrymnyń taraýyna túrtki bolǵan. Degenmen keı sarapshylar "qos bılik ornady degennen góri bılik Nazarbaevtyń qolynda qaldy" degen tujyrym shyndyqqa kóbirek sáıkes keledi dep sanaıdy.
