Qazaqstandaǵy meiramhanalarda jyl saiyn 17 myń tonna tamaq qaldyǵy qoqysqa tastalady, dep habarlaidy Dalanews.kz nur.kz-ke siltep.
"Qazaqstannyń restoratorlar klýby qaýymdastyǵy" usynǵan málimet boiynsha elimizdegi meiramhanalar men qonaq úiler jyl saiyn orta eseppen 17 myń tonna tamaq qaldyǵyn qoqysqa tastaidy. Óitkeni toi-jiyn kóp, as-sadaqa da az emes. Bul jóninde Senat depýtaty Álisher Satybaldiev "Túiin" baǵdarlamasynda pikir bildirdi.
Depýtattyń aitýynsha, ysyrap, obal máselesi qoǵamnyń basty dertine ainaldy.
"Buryn ómirdiń máni, filosofiiasy "obal" degen bir ǵana uǵymnan turatyn edi. Al qazir kóp resýrs qoljetimdi. Naryqtyq zamanda adamdar bir-birimen básekege túsip, obal, ysyrap, únemdeý máseleleri ekinshi orynǵa túsip qaldy. Bul ekonomikalyq máselelerge alyp kelýi múmkin. Sonyń aiqyn kórinisi – tutyný nesieleri. Halyq 4,4 trln tenge kóleminde tutyný nesiesin alǵan. Bankterge bereshek azamattar kóp. Nesieniń kóp bóligi júzdegen adamdy jinap, asta-tók toi ótkizý úshin alynǵan. Jas jubailardyń ómiri toidan keiingi kredit tóleýmen ótip jatyr", - deidi senator.
Senat depýtaty Ulttyq quryltaida aitylǵan bes keseldiń bireýi ysyrapshyldyq ekenin jetkizdi.
"Tutyný mádenietin qalai qalyptastyramyz? Búkil el bolyp ideologiialyq maidan ashýymyz kerek. Únemdeý mádenietin qalyptastyrý mańyzdy. Eýropadan úirenerimiz kóp. Asty rásýa etýden bólek, qazir jastarymyz ýaqytty ysyrap qylyp jatyr. Kitaphanalarymyz bos tur. Jastar kúnine 5-6 saǵat ýaqytyn áleýmettik jelige jumsaidy", - deidi ol.
