Qazaqstandaǵy emhanalar ebin taýyp jalǵan qabyldaý júrgizip otyrǵan
Al mundai zań buzýshylyqtarǵa meditsinalyq saqtandyrýdyń eti úirengendei. Jurttyń shýynan soń, olar ile-shala alty aida 12 myńdai qatelik taptyq dep otyr.
Aigúl Ótepova elordadaǵy №13 emhanada demikpe aýrýymen tirkeýde tur. Tegin dári-dármek alady, dárigerleri de ony bes saýsaǵyndai biledi. Áleýmettik jelilerdegi qyzý talqydan soń, Aigúl "Damýmed" qosymshasyna kirip, dáriger qabyldaýyna jazylǵan kúnderin qaraidy. Sóitse, onyń da syrtynan qabyldaý jasalǵan. Elorda turǵyny muny "alaiaqtyq" dep otyr.
Aigúl Ótepova, Nur-Sultan qalasynyń turǵyny:
- Ýchaskelik dáriger óziniń sheshimin shyǵarý úshin ol aýrýdy jeke kórýi kerek, jeke kezdesýi kerek. Telefonmen habarlasqan tolyq meditsinalyq konsýltatsiiaǵa jata ma, jatpai ma, bilmeimin. Meniń oiymsha, jatpaidy. Eger olar "aýrýdy qabyldadyq" dep belgilep qoisa, ol – alaiaqtyq. Bizdiń aqshany jeý dep sanaimyn.
Bas shahardyń taǵy bir turǵyny Aigúl Qanapinanyń da "Damýmedke" tańy bar. Ony dárigerleri túngi saǵat bir jarymǵa qabyldaýǵa jazyp qoiypty.
Aigúl Qanapina, Nur-Sultan qalasynyń turǵyny:
- 17-maýsym kúni "Damýmed" baǵdarlamasynda meniń túngi saǵat 1 jarymda Nur-Sultan qalasynyń №2 emhanasyndaǵy dárigerge jazylǵan ekenmin. Ne masqara?! Túnde emhanada meni eshkim qabyldamaityny belgili ǵoi. Keiin taǵy qarap otyrsam, ekpe egilgen, dári berilgen. Men eshqaisysyn alǵan joqpyn.
"Damýmed" - Qazaqstanda kóshirmesi joq, meditsinalyq qyzmetti bir arnaǵa toǵystyrǵan júie. Mobildi qosymsha arqyly naýqastar dáriger qabyldanýyna jazylyp, em alyp, jedel járdemdi de shaqyrta alady. Al astyrtyn jazba jazyp, jalǵan aqpar berý tek qosymshaǵa kirý múmkindigi barlardyń qolynan keletin is eken. Júie avtorlary adamdardy aldaityn emhanalardy anyqtap berdik dep, máz.
Natalia Kil, "Damý" aqparattyq tehnologiialar ortalyǵy" kompaniiasynyń bas direktory:
- Biz qadaǵalaý organy nemese densaýlyq saqtaý basqarmasy emespiz. Árdaiym jumysymyzdy tiianaqty, jaqsy jasaýǵa tyrysamyz. Biz adamdarǵa shynaiy aqparatty kórýge, zańbuzýshylyqty anyqtaýǵa múmkindik berdik. Bul – ashyqtyq. Tsifrlandyrýdyń basty maqsaty da osy. Bul qural siiaqty. Sondyqtan kez kelgen qural siiaqty, ony durys paidalaný kerek.
Emhanalardyń mundai áreketke barýynyń máni mynada: "Damýmed" arqyly em-dom sharalary júrgizilse, mindetti áleýmettik meditsinalyq saqtandyrý qorynan aqsha bólinedi. "Barmaq basty, kóz qystyǵa" barǵan aq halattylar osylai ońai oljaǵa keneledi. Adamdy emdemei, tek qaltasyna qyzyqqandardyń isin Densaýlyq saqtaý ministrligi biledi eken. Sońǵy alty aida anyqtalǵan 12 myńdai jalǵan qabyldaýlardyń kesirinen, biýdjettiń 75 million teńgesi talan-tarajǵa túsken.
Baǵdat Qojahmetov, QR densaýlyq saqtaý ministrliginiń resmi ókili:
- Qazir zańdy turǵyda saraptama júrgizilip jatyr. Dárigerler men emhana basshylaryna qatysty jazany qatańdatý jaǵyn qarastyramyz. Bul - óreskel zańbuzýshylyq. Mundai qatelikter adamdardyń ómirine, densaýlyǵyna qatty áser etýi múmkin.
"Tegin emdedik" dep, ózderiniń naýqastaryn syrtynan emdegen meditsinalyq uiymdar, sáikesinshe meditsinalyq saqtandyrý qoryna da "qatyrdyq" dep esep beretini sózsiz. Al qor buqaranyń daýynan keiin ilezde zańbuzýshylyqtardy anyqtadyq dep aqtaldy. Endi ótirik emdegen emhanalarǵa aiyppul salynady.
Aiyppul kólemi meditsinalyq qyzmet kórsetý qunynyń 300 paiyzyn quraidy. Aq halattylardyń qalai emdep, qandai em sharalaryn júrgizgenin qor ókilderi "Damýmed" arqyly bilip almaqshy. 300 paiyzdyq aqshalai ótemdi emhana basshylary óteýi tiis. Al dárigerler tártiptik jazamen qutylady.
