ال مۇنداي زاڭ بۇزۋشىلىقتارعا مەديسينالىق ساقتاندىرۋدىڭ ەتى ۇيرەنگەندەي. جۇرتتىڭ شۋىنان سوڭ، ولار ىلە-شالا التى ايدا 12 مىڭداي قاتەلىك تاپتىق دەپ وتىر.
ايگۇل وتەپوۆا ەلورداداعى №13 ەمحانادا دەمىكپە اۋرۋىمەن تىركەۋدە تۇر. تەگىن دارى-دارمەك الادى، دارىگەرلەرى دە ونى بەس ساۋساعىنداي بىلەدى. الەۋمەتتىك جەلىلەردەگى قىزۋ تالقىدان سوڭ، ايگۇل "دامۋمەد" قوسىمشاسىنا كىرىپ، دارىگەر قابىلداۋىنا جازىلعان كۇندەرىن قارايدى. سويتسە، ونىڭ دا سىرتىنان قابىلداۋ جاسالعان. ەلوردا تۇرعىنى مۇنى "الاياقتىق" دەپ وتىر.
ايگۇل وتەپوۆا، نۇر-سۇلتان قالاسىنىڭ تۇرعىنى:
- ۋچاسكەلىك دارىگەر ءوزىنىڭ شەشىمىن شىعارۋ ءۇشىن ول اۋرۋدى جەكە كورۋى كەرەك، جەكە كەزدەسۋى كەرەك. تەلەفونمەن حابارلاسقان تولىق مەديسينالىق كونسۋلتاسياعا جاتا ما، جاتپاي ما، بىلمەيمىن. مەنىڭ ويىمشا، جاتپايدى. ەگەر ولار "اۋرۋدى قابىلدادىق" دەپ بەلگىلەپ قويسا، ول – الاياقتىق. ءبىزدىڭ اقشانى جەۋ دەپ سانايمىن.
باس شاھاردىڭ تاعى ءبىر تۇرعىنى ايگۇل قاناپينانىڭ دا "دامۋمەدكە" تاڭى بار. ونى دارىگەرلەرى تۇنگى ساعات ءبىر جارىمعا قابىلداۋعا جازىپ قويىپتى.
ايگۇل قاناپينا، نۇر-سۇلتان قالاسىنىڭ تۇرعىنى:
- 17-ماۋسىم كۇنى "دامۋمەد" باعدارلاماسىندا مەنىڭ تۇنگى ساعات 1 جارىمدا نۇر-سۇلتان قالاسىنىڭ №2 ەمحاناسىنداعى دارىگەرگە جازىلعان ەكەنمىن. نە ماسقارا؟! تۇندە ەمحانادا مەنى ەشكىم قابىلدامايتىنى بەلگىلى عوي. كەيىن تاعى قاراپ وتىرسام، ەكپە ەگىلگەن، ءدارى بەرىلگەن. مەن ەشقايسىسىن العان جوقپىن.
"دامۋمەد" - قازاقستاندا كوشىرمەسى جوق، مەديسينالىق قىزمەتتى ءبىر ارناعا توعىستىرعان جۇيە. ءموبيلدى قوسىمشا ارقىلى ناۋقاستار دارىگەر قابىلدانۋىنا جازىلىپ، ەم الىپ، جەدەل جاردەمدى دە شاقىرتا الادى. ال استىرتىن جازبا جازىپ، جالعان اقپار بەرۋ تەك قوسىمشاعا كىرۋ مۇمكىندىگى بارلاردىڭ قولىنان كەلەتىن ءىس ەكەن. جۇيە اۆتورلارى ادامداردى الدايتىن ەمحانالاردى انىقتاپ بەردىك دەپ، ءماز.
ناتاليا كيل، "دامۋ" اقپاراتتىق تەحنولوگيالار ورتالىعى" كومپانياسىنىڭ باس ديرەكتورى:
- ءبىز قاداعالاۋ ورگانى نەمەسە دەنساۋلىق ساقتاۋ باسقارماسى ەمەسپىز. ءاردايىم جۇمىسىمىزدى تياناقتى، جاقسى جاساۋعا تىرىسامىز. ءبىز ادامدارعا شىنايى اقپاراتتى كورۋگە، زاڭبۇزۋشىلىقتى انىقتاۋعا مۇمكىندىك بەردىك. بۇل – اشىقتىق. سيفرلاندىرۋدىڭ باستى ماقساتى دا وسى. بۇل قۇرال سياقتى. سوندىقتان كەز كەلگەن قۇرال سياقتى، ونى دۇرىس پايدالانۋ كەرەك.
ەمحانالاردىڭ مۇنداي ارەكەتكە بارۋىنىڭ ءمانى مىنادا: "دامۋمەد" ارقىلى ەم-دوم شارالارى جۇرگىزىلسە، مىندەتتى الەۋمەتتىك مەديسينالىق ساقتاندىرۋ قورىنان اقشا بولىنەدى. "بارماق باستى، كوز قىستىعا" بارعان اق حالاتتىلار وسىلاي وڭاي ولجاعا كەنەلەدى. ادامدى ەمدەمەي، تەك قالتاسىنا قىزىققانداردىڭ ءىسىن دەنساۋلىق ساقتاۋ مينيسترلىگى بىلەدى ەكەن. سوڭعى التى ايدا انىقتالعان 12 مىڭداي جالعان قابىلداۋلاردىڭ كەسىرىنەن، بيۋدجەتتىڭ 75 ميلليون تەڭگەسى تالان-تاراجعا تۇسكەن.
باعدات قوجاحمەتوۆ، ق ر دەنساۋلىق ساقتاۋ مينيسترلىگىنىڭ رەسمي وكىلى:
- ءقازىر زاڭدى تۇرعىدا ساراپتاما جۇرگىزىلىپ جاتىر. دارىگەرلەر مەن ەمحانا باسشىلارىنا قاتىستى جازانى قاتاڭداتۋ جاعىن قاراستىرامىز. بۇل - ورەسكەل زاڭبۇزۋشىلىق. مۇنداي قاتەلىكتەر ادامداردىڭ ومىرىنە، دەنساۋلىعىنا قاتتى اسەر ەتۋى مۇمكىن.
"تەگىن ەمدەدىك" دەپ، وزدەرىنىڭ ناۋقاستارىن سىرتىنان ەمدەگەن مەديسينالىق ۇيىمدار، سايكەسىنشە مەديسينالىق ساقتاندىرۋ قورىنا دا "قاتىردىق" دەپ ەسەپ بەرەتىنى ءسوزسىز. ال قور بۇقارانىڭ داۋىنان كەيىن ىلەزدە زاڭبۇزۋشىلىقتاردى انىقتادىق دەپ اقتالدى. ەندى وتىرىك ەمدەگەن ەمحانالارعا ايىپپۇل سالىنادى.
ايىپپۇل كولەمى مەديسينالىق قىزمەت كورسەتۋ قۇنىنىڭ 300 پايىزىن قۇرايدى. اق حالاتتىلاردىڭ قالاي ەمدەپ، قانداي ەم شارالارىن جۇرگىزگەنىن قور وكىلدەرى "دامۋمەد" ارقىلى ءبىلىپ الماقشى. 300 پايىزدىق اقشالاي وتەمدى ەمحانا باسشىلارى وتەۋى ءتيىس. ال دارىگەرلەر تارتىپتىك جازامەن قۇتىلادى.
