Ázerbaijan memleketiniń basshylyǵy halyqaralyq platformalar, ekijaqty jáne kópjaqty resmi kezdesýler arqyly Armeniianyń Ázerbaijanǵa qarsy arandatýshylyq josparlap, jańa territoriialardy basyp alýǵa daiyndalyp, qarýlanýdy qarqyndy júrgizip jatqanyn, sondai-aq maidan shebi men Ázerbaijan-Armeniia shekarasy boiyna qosymsha áskeri tehnika men jumys kúshin jumyldyrǵanyn halyqaralyq qaýymdastyqqa únemi eskertip otyrdy. Armeniia basshylyǵynyń sońǵy qadamdary muny anyq rastaidy: Armeniia premer-ministri elde on myńdaǵan adamdy biriktiretin "erikti" áskeri bólimder quratynyn jariialady, moiyndalmaǵan "Taýly Qarabaq Respýblikasynyń" parlamentin ejelgi ázerbaijan qalasy Shýsha qalasyna kóshirý týraly sheshim qabyldady, Armeniianyń qorǵanys ministri "jańa jerler úshin jańa soǵys" jariialady, Armeniia basyp alǵan territoriialarǵa etnikalyq armiandardy zańsyz qonystandyrý saiasatyn júrgize bastady. Osylaisha jýyrda Jeneva konventsiiasynyń baptaryna qaishy, armian tektes livandyq otbasylardyń kóp bóligi Taýly Qarabaq pen irgeles jeti oblysqa qonystandyryldy.
Armeniianyń maqsaty – basyp alynǵan territoriialardaǵy statýs-kvony kez kelgen jolmen saqtap qalý, sondai-aq óte kúrdeli áleýmettik jáne ekonomikalyq máselelerden óz eliniń turǵyndarynyń nazaryn burý.
Munyń bári Ázerbaijanǵa qarsy kezekti arandatýshylyqqa daiyndyq kezeńi boldy. Bul jospardyń kezeńderiniń biri Armeniia qarýly kúshteriniń Ázerbaijan Respýblikasynyń Armeniia Respýblikasymen memlekettik shekarasynda ornalasqan Tovýz aýdany baǵytynda 2020 jyldyń 12-16 shildesinde Ázerbaijannyń kólik jáne energetikalyq joldaryn baqylaýǵa alý áreketteri boldy.
Ázerbaijan tarapy munyń bári áskeri qylmys bolýmen qatar, Armeniianyń Ázerbaijanǵa qarsy áskeri agressiiasyn toqtatýyn, armian qarýly qurylymdaryn basyp alynǵan jerlerden shuǵyl jáne bultaryssyz shyǵarýdy talap etetin halyqaralyq uiymdardyń sheshimderine, BUU Qaýipsizdik Keńesiniń №822, 853, 874, 884 qaýlylaryna jáne janjaldy ádil sheshýge bailanysty basqa da halyqaralyq qujattarǵa múldem qaishy keletinin málimdegen bolatyn.
Osy protsesterdiń jáne boljaldy oqiǵalardyń damýynyń logikalyq saldary retinde 2020 jyldyń 27 qyrkúieginde shamamen tańǵy saǵat 06.00-de armian qarýly kúshteri búkil maidan boiynda qaitadan arandatýshylyq jasap, aýyr qarý-jaraq pen artilleriiany qoldanyp, maidan shebi boiyndaǵy beibit turǵyndar men eldi mekenderge oq jaýdyrdy. Osynyń saldarynan Ázerbaijannyń beibit turǵyndary qaza taýyp, jaraqat aldy.
Qazirgi ýaqytta Ázerbaijan Armiiasy óz halqy men memleketin qorǵaý, qaýip tóndiretin áskeri nysandardy beitaraptandyrý jáne territoriialyq tutastyqty qamtamasyz etý úshin qajetti sharalardy qabyldaýda. Ázerbaijannyń Armeniiaǵa eshqandai territoriialyq talaptary joq jáne Armeniianyń arandatýshylyq áreketin joiatyn shaiqastar Ázerbaijan Armiiasynyń qarsy shabýylymen barlyq memleketter men halyqaralyq uiymdar, sonyń ishinde BUU-men tanylǵan Ázerbaijan shekaralary sheńberinde, Armeniia basyp alǵan territoriialarda júrgizilip jatyr.
Armeniia-Ázerbaijan Taýly Qarabaq qaqtyǵysynda birqatar múddeli taraptar bar ekenin atap ótken jón.
Osyǵan bailanysty, biz baýyrlas Qazaqstanda jumys isteitin keibir táýelsiz buqaralyq aqparat quraldary men internet-resýrstarda basyp alynǵan territoriialarda ózin-ózi jariialaǵan Taýly Qarabaq Respýblikasynyń separatistik rejim qurylymdary taratqan jalǵan aqparatqa, sondai-aq basqa elderdiń aqparat agenttikteriniń burmalanǵan materialdaryna silteme jasaǵanyna qynjylamyz.
Barlyq buqaralyq aqparat quraldaryn, jýrnalister men jeke adamdardy osy máselege muqiiat bolýǵa, qaqtyǵystarda múddesi bar basqa memleketterdiń qazaqstandyq qoǵamdy adastyrýy múmkin burmalanǵan aqparaty men aqparattyq resýrstaryna silteme jasamaýǵa shaqyramyz.
Qazaqstan Respýblikasy Ázerbaijan Respýblikasynyń territoriialyq tutastyǵyn tanidy jáne qoldaidy. Qazaqstan moiyndamaǵan separatistik rejim taratqan aqparatqa silteme jasaý halyqaralyq kelisimderge, ortaq tarihi qundylyqtarymyzǵa, sondai-aq qazaq jáne ázerbaijan halyqtarynyń dostyǵy men baýyrlastyǵyna qaishy keledi dep sanaimyz.
Ázerbaijan Respýblikasynyń Qazaqstan Respýblikasyndaǵy Elshiligi buqaralyq aqparat quraldarynan, jýrnalister men jeke tulǵalardan elimizde bolyp jatqan oqiǵalar týraly dálirek jáne beitarap aqparatty Ázerbaijannyń resmi organdary men resmi aqparattyq agenttikteriniń veb-saittary men internet-resýrstarynan alýdy suraidy.
Ázerbaijannyń resmi jáne táýelsiz aqparattyq resýrstary:
Resmi aqparattyq saittar:
hhttps://ru.president.az/
https://mod.gov.az/ru/
https://mfa.gov.az/en
https://azertag.az/ru/
Táýelsiz aqparattyq agenttikter:
https://apa.az/ru
https://www.trend.az/
https://1news.az/
