Qazaqstannyń úzdik muǵalimderi millioner atandy. Búgin Astanadaǵy Táýelsizdik saraiynda QR Bilim jáne ǵylym ministri Aslan Sárinjipovtyń qatysýymen «2014 jyldyń úzdik pedagogi» atty respýblikalyq baiqaýdyń jeńimpazdaryn marapattaý rásimi ótti.
QR BǴM Mektepke deiingi, orta bilim jáne aqparattyq tehnologiialar departamentiniń direktory Jańyl Jontaevanyń aitýynsha, baiqaý biylǵy sáýirde bastaý aldy. Oǵan 5,6 myń muǵalim qatysyp, respýblikalyq kezeńge 200 oqytýshy ótti.
«Osynyń ishinde 48 muǵalim respýblikalyq kezeńde baiqaýdyń jeńimpazy bolyp tanyldy. Olardyń arasynda túrli pánderdiń pedagogtary bar. Osy oraida oqý úderisine aqparattyq tehnologiialardy engizip jatqan muǵalimder úzdik dep tanyldy. Jalpy búgingi marapattalyp otyrǵan oqytýshylar bilim salasyna eleýli úles qosyp otyrǵandar», - dedi ol.
Konkýrstyń respýblikalyq kezeńiniń qorytyndysy boiynsha 48 jeńimpazdyń 32-si mektepke deiingi jáne orta bilim júiesiniń pedagogtary, al qalǵan 16-sy tehnikalyq jáne kásibi bilim berý júiesiniń mamandary.
Marapattaý rásimi barysynda jeńimpazdarǵa «2014 jyldyń úzdik pedagogi» tós belgisi men 1 mln. 852 myń teńge mólsherinde syiaqy tapsyryldy.
Avtor: Zeinolla Abajanov
