Qazaqstanda avtomobil joldaryn salý, qaita jańartý jáne jóndeý kezinde qoldanylatyn otandyq tsementtiń sapasyna aýqymdy zertteý júrgizilýde. Bul jumystardy «QazjolǴZI» mamandary qolǵa aldy, dep habarlaidy dalanews.kz.
Kólik ministrliginiń málimetinshe, zertteý «Qazaqstanda óndirilgen tsementterdiń himiialyq quramy men fizikalyq-mehanikalyq qasietterin taldaý» ǵylymi jobasy aiasynda júzege asyrylýda. Jobanyń negizgi maqsaty – otandyq tsementtiń sapasyn baǵalap, elimizdiń klimattyq erekshelikterin eskere otyryp jol qurylysyna arnalǵan tsementke ǵylymi negizdelgen talaptar ázirleý.
«QazjolǴZI» mamandarynyń aitýynsha, tsement jol qurylysynyń negizgi materialdarynyń biri bolyp sanalady. Onyń sapasy jol tóseminiń beriktigine, aiazǵa tózimdiligine, temperatýralyq ózgeristerge shydamdylyǵyna jáne avtomobil joldarynyń qyzmet etý merzimine tikelei áser etedi.
Qazir tsement úlgilerin irikteý jumystary «QazAvtoJol» ulttyq kompaniiasy, Jol aktivteriniń ulttyq sapa ortalyǵy jáne tsement óndirýshi zaýyttardyń ókilderiniń qatysýymen júrgizilýde. Qazaqstanda búginde qurylys salasyna ónim shyǵaratyn 11 tsement zaýyty jumys isteidi.
Zertteý aiasynda Mańǵystaý, Qyzylorda jáne Túrkistan oblystaryndaǵy, sondai-aq Shymkent qalasyndaǵy kásiporyndardan tsement synamalary alyndy. Mamandardyń aitýynsha, úlgilerdiń tikelei óndiris oryndarynan alynýy ónim sapasy týraly barynsha obektivti derekter jinaýǵa múmkindik beredi.
Ǵalymdar tsementterdiń fizikalyq-mehanikalyq qasietteri men himiialyq quramyn zerttep, túrli mineraldyq jáne himiialyq qospalardyń áserin baǵalaidy. Sonymen qatar otandyq kásiporyndardyń óndiristik qýaty men ónim túrlerine qatysty derekter de jinaqtalady.
Zertteý nátijesinde «Jol tsementi» atty jańa normativtik-tehnikalyq qujat ázirlenbek. Bul qujat tsement-beton joldaryn salýda qoldanylatyn tsementterge qoiylatyn biryńǵai talaptardy belgileýge múmkindik beredi.
Mamandardyń pikirinshe, zertteý qorytyndylary jol-qurylys materialdarynyń sapasyn arttyryp, tsement-beton jabyndarynyń uzaq qyzmet etýine jaǵdai jasaidy jáne Qazaqstanda zamanaýi jol salý tehnologiialaryn keńinen engizýge negiz bolady.
