Keıingi jyldary Qazaqstanda nekege turý kórsetkishi aıtarlyqtaı tómendep barady. 2025 jyldyń aldyn ala derekteri boıynsha, jalpy neke koefısıenti 5,62-ge deıin túsip, Táýelsizdik kezeńindegi eń tómen deńgeıge jetti. Bir jyldyń ishinde kórsetkish taǵy da tómendep, burynǵy jylmen salystyrǵanda 0,51 pýnktke azaıǵan, dep habarlaıdy Dalanews.kz.

Data Hub deregine súıensek, 1991 jyldan beri neke kórsetkishi birde ósip, birde tómendep otyrǵan. Al keıingi 12 jylda ol 4 pýnktten asa azaıyp, qazir 1999 jylǵy eń tómen deńgeıge jaqyndady.

Mamandardyń aıtýynsha, el halqy kóbeıip jatqanymen, tirkelgen nekeler sany kerisinshe azaıyp barady. 2025 jyly Qazaqstanda 114,5 myń neke qıylǵan, bul bir jyl burynǵydan 7 paıyz az. Mundaı tómen kórsetkish keıingi 22 jylda alǵash ret tirkeldi.

Degenmen bul jaǵdaıdy qazaqstandyqtardyń "nekege múlde qyzyǵýshylyǵy joǵaldy" dep birjaqty túsindirýge bolmaıdy.

Óıtkeni nekeniń basym bóligi 18–39 jas aralyǵynda qıylady, al sońǵy jyldary osy jastaǵy jastar sany azaıǵan. Sonymen birge jastardyń otbasyn keshirek qurýy jıilep, nekege turý jasy shamamen bir jasqa ulǵaıdy. 

Buǵan qosa, resmı tirkelmegen azamattyq jáne dinı nekelerdiń kóbeıýi de resmı statısıkaǵa áser etpeı qoımaıdy.