Prezident Qasym-Jomart Toqaev kúshtik qurylymdar, sot jáne qadaǵalaý organdarynyń vedomstvolyq nagradalary júiesin jańartatyn jarlyqqa qol qoidy. Ózgeristerdiń nátijesinde tórt memlekettik organ alǵash ret óz nagradalaryna ie boldy, marapattar tizimine «Ǵaziz Baitasov» medali engizildi, ardagerlerge arnalǵan medaldar sany aitarlyqtai artty, al «Minsiz qyzmeti úshin» medaliniń úshinshi dárejesi alynyp tastaldy, dep habarlaidy dalanews.kz.
Áńgime 2026 jylǵy 27 shildede qabyldanǵan №1381 Prezident jarlyǵy týraly bolyp otyr. Qujat 2011 jylǵy 30 qyrkúiektegi №155 jarlyqqa ózgerister engizip, vedomstvolyq nagradalardyń tizbesi men sipattamasyn, sondai-aq olardy berý qaǵidalaryn jańa redaktsiiada bekitedi. Jarlyq qol qoiylǵan kúnnen bastap kúshine endi.
Jalpy nagradalar sany kóp ózgergen joq. Qazirgi tańda tizimde 66 ataý bar: 33 medal jáne 33 tósbelgi. Buryn olardyń sany shamamen 65 bolatyn. Alaida marapattardyń qurylymy edáýir jańartyldy. Buryn ár vedomstvonyń bir medaliniń jeke úlgileri bolǵan bolsa, endi olardyń ornyna biryńǵai úlgi engizildi.
Jańa júiege sáikes óz vedomstvolyq nagradalary bar memlekettik organdar sany 17-den 21-ge deiin ósti. Alǵash ret mundai marapattar:
- Joǵary Sot Keńesine – «Joǵary Sot Keńesiniń ardageri» medali jáne eki tósbelgi;
- Sot ákimshiligine – medal men tósbelgi;
- Atom energiiasy agenttigine – «Atom salasynyń úzdigi» tósbelgisi;
- Adam quqyqtary jónindegi ulttyq ortalyqqa – «Adam quqyqtaryn qorǵaýǵa qosqan úlesi úshin» tósbelgisi berildi.
Sońǵy nagrada óńirlik ombýdsmen ókilderine, ortalyq qyzmetkerlerine, sheteldik ombýdsmenderge, memlekettik organdar men úkimettik emes uiymdardyń quqyq qorǵaý salasyna úles qosqan ókilderine tabystalýy múmkin.
IIM-de «Ǵaziz Baitasov» medali paida boldy
Ishki ister ministrliginiń vedomstvolyq nagradalary qatarynda «Ǵaziz Baitasov» atty jańa medal engizildi. Onyń qurylatynyn Memleket basshysy 2026 jylǵy 6 mamyrda Otan qorǵaýshylar kúnine arnalǵan saltanatty jiynda jariialaǵan bolatyn.
Prezidenttiń aitýynsha, erlikpen qaza tapqan batyrlardyń esimin vedomstvolyq nagradalarǵa berý tájiribesi jalǵasady. Alǵashqylardyń biri bolyp 15 jyl buryn jankeshti lańkesti ustaý kezinde qaza tapqan politsiia kapitany Ǵaziz Baitasovtyń esimi berildi.
Jańa medal áskeri jáne qyzmettik boryshyn óteý kezinde erekshe batyldyq, janqiiarlyq, joǵary kásibilik pen tabandylyq tanytqan IIM qyzmetkerlerine, sondai-aq azamattardyń ómiri men densaýlyǵyn qorǵaýda, qoǵamdyq tártipti saqtaýda, qylmystyń aldyn alý men jolyn kesýde, tótenshe jaǵdailar kezinde jáne memlekettiń múddesin qorǵaýda erlik kórsetken qyzmetkerlerge tabystalady.
